२४ कार्तिक २०७८, बुधबार ०८:०३ बुधवार साप्ताहिक, नयाँबानेश्वर, काठमाण्डौं

भारतका यातायातमन्त्री गडकरी नेपाल आउँदै

२४ कात्तिक, काठमाडौं । भारतका यातायातमन्त्री नितिन गडकरी नेपाल भ्रमणमा आउने भएका छन् । सत्तारूढ भारतीय जनता पार्टीका वरिष्ठ नेता गडकरी पतञ्जलि योगपीठ (नेपाल) को निम्तामा मंसिर २ गते काठमाडौं आउने भएका हुन् ।

पतञ्जलि योगपीठले मंसिर ३ गते काठमाडौंमा आयोजना गर्ने कार्यक्रममा सहभागी हुन उनी यहाँ आउने भएका हुन् । योगपीठका नेपाल प्रमुख शालिग्राम सिंहले भारतीय मन्त्री गडकरी नेपाल आउने निश्चित भएको जानकारी दिए ।

उनका अनुसार गडकरीले प्रधानमन्त्री शेरबहादुर देउवालगायत उच्च सरकारी अधिकारीलाई भेट्ने कार्यक्रम पनि छ । साथमा योगगुरु रामदेव र आचार्य बालकृष्ण पनि नेपाल आउने छन् । उनीहरूको टोली मंसिर ३ गते स्वदेश फर्किनेछ ।

नेपालस्थित भारतीय दूतावासले भने गडकरीको नेपाल भ्रमणको औपचारिक जानकारी नरहेको बताएको छ । गडकरी पतञ्जलि योगपीठले ल्याउन लागेका दुईवटा टिभी च्यानल आस्था नेपाल र पतञ्जलि (नेपाल) को उद्घाटनमा सहभागी हुनेछन् । ती च्यानलको उद्घाटन प्रधानमन्त्री देउवाले गर्नेछन् ।