२२ मंसिर २०७८, बुधबार ०९:१७ बुधवार साप्ताहिक, नयाँबानेश्वर, काठमाण्डौं

कांग्रेस संस्थापनबाट महामन्त्री पदमा तीन नेताको दाबी

२२ मंसिर, काठमाडौं । नेपाली कांग्रेसको संस्थापन पक्षबाट आसन्न चौधौं महाधिवेशनमा महामन्त्री पदका लागि तीन नेताले दाबी गरेका छन्।

सभापति शेरबहादुर देउवानिवास बूढानीलकण्ठमा जारी संस्थापन पक्षीय नेताहरुको बैठकमा तीन नेताले महामन्त्री पदमा दाबी पेश गरेका हुन्।

बैठकमा सहभागी एकजना नेताका अनुसार डा. प्रकाश शरण महत, बालकृष्ण खाण र एनपी साउदले महामन्त्री पदमा दाबी गरेका हुन्।

यो बैठकमा महामन्त्रीका अर्का दाबेदार ज्ञानेन्द्रबहादुर कार्की भने अनुपस्थित छन्। महामन्त्री दाबी गर्नेमा खाण अहिले गृहमन्त्री छन।

महत र साउद भने सरकारी भूमिकामा छैनन्। यी तीनैजना देउवाका विश्वासपात्र मानिन्छन्। बैठकमा अनुपस्थित कार्कीलाई पनि महामन्त्रीका एक प्रत्यासीका रुपमा हेरिएको छ।

इतर समूहबाट महामन्त्रीमा गगन थापा, विश्वप्रकाश शर्मा, डा. मिनेन्द्र रिजाल र प्रदीप पौडेलसहितले दाबी गरिरहेका छन्।

उता सहमहामन्त्री पदमा १२ जना भन्दा धेरै नेताहरुले दाबी गरेका छन्। कांग्रेसको विधानमा आठजना सह-महामन्त्री हुने व्यवस्था छ।

त्यहीकारण यो पदमा आकांक्षीको संख्या पनि संस्थापनमै दर्जन नाघेको हो।