११ फाल्गुन २०७८, बुधबार ११:४७ बुधवार साप्ताहिक, नयाँबानेश्वर, काठमाण्डौं

प्रधानमन्त्री एमालेसँग समीकरण गर्न स्वतन्त्र हुनुहुन्छ : झलनाथ खनाल

११ फागुन,काठमाडौं । सत्ता साझेदार नेकपा (एकीकृत समाजवादी) का सम्मानित नेता झलनाथ खनालले प्रधानमन्त्री शेरबहादुर देउवा एमालेसँग समीकरण गरेर संसदबाट एमसीसी पास गर्न स्वतन्त्र रहेको बताएका छन् ।

बुधबार पूर्व प्रधानमन्त्री समेत रहेका खनालले देश हितविपरीत एमसीसी पास गर्ने कांग्रेसको अडान हो भने प्रधानमन्त्री देउवा एमालेसँग समीकरण गरेर अगाडि बढ्न स्वतन्त्र रहेको बताएका हुन् ।

समीकरण कसले कस्तो गर्ने भन्ने कुराको निम्ति हामी सबै स्वतन्त्र छौं । यदि कांग्रेस एमालेसँग समीकरण गरेर अघि बढ्न चाहन्छ भने मैले प्रधानमन्त्री स्वयंलाई पनि भनेको छु, तपाईं स्वतन्त्र हुनुहुन्छ । अरू कांग्रेसका नेताहरूलाई पनि भनेको छु- तपाईंहरू स्वतन्त्र हुनुहुन्छ । हामी हाम्रो बाटो हिँड्छौं । आ-आफ्नो बाटो हिंड्नु पर्ने एउटा स्थिति आउन सक्छ नेता खनालले भने, त्यसले केही फरक पार्नेवाला छैन । त्यसो गरिहालेमा पनि आकाश खस्नेवाला पनि छैन, पृथ्वी फाट्नेवाला पनि छैन ।

नेता खनालले प्रधानमन्त्री देउवा अमेरिकाको पासोमा परेको बताएका छन् । अमेरिकी पासोमा परेर प्रधानमन्त्री देउवा एमसिसी पास गर्न लागिपरेको उनको भनाइ छ । उनले नेकपा (एस) र नेकपा माओवादी केन्द्रले एमसिसीको विपक्षमा मतदान गर्ने बताउँदै प्रधानमन्त्री देउवासँग एमसीसी पास गर्नका लागि अब एमालेसँग साँठगाँठ गर्नुको विकल्प नभएको पनि बताए ।

नेता खनालले एमसिसी सम्झौता गरेपछि नेपालले उदार अर्थतन्त्र मान्नुपर्ने, उदार लोकतन्त्र मान्नुपर्ने, बजार अर्थतन्त्र मान्नुपर्ने, अमेरिकाको प्रचलित कानुनहरू र पछि बन्ने कानुनहरू पनि मान्नुपर्ने जस्ता सर्तहरू रहेको उल्लेख गर्दै यस्ता विषयहरूमा नेपालले एमसीसी पास गर्न नसक्ने बताए ।

उनले संविधानको विपरीत एमसीसी संसदमा टेबुल भएकाले आफूले विरोध गरेको बताए । नेकपा (एस) का अध्यक्ष माधवकुमार नेपालले एमसीसी टेबुल गर्ने सहमति दिएको भन्ने सुन्नमा आएको भए पनि पार्टीले कुनै पनि निणर्य नगरेको बताए । उनले भने, संविधानका खिलाफ गएर अहिले यो टेबुल भएको छ । यसकारण पनि मैले विरोध गरेको छु । हाम्रो अध्यक्षले पनि सहमति दिनु भएको भन्ने कुरा छ, तर हाम्रो पार्टीले त्यसरी टेबुल गर्नुपर्छ भनेर कतै निणर्य गरेको छैन ।