२१ फाल्गुन २०७८, शनिबार १३:२७ बुधवार साप्ताहिक, नयाँबानेश्वर, काठमाण्डौं

मुस्ताङमा हिमपहिरो : २९ चौंरीसहितको गोठ पुर्‍यो, गोठाला भागेर जोग्गिए

२१ फागुन, मुस्ताङ । मुस्ताङको मानापाथी हिमालबाट फेरि हिमपहिरो खसेको छ । कार्तिकको तेस्रो साता हिमपहिरो खस्दा भागदौड मच्चिएको थियो । त्यसको तीन महिना नबित्दै फेरि सोही ठाउँमा हिमपहिरो खसेको हो ।

हिमपहिरोका कारण चौंरीगोठ पुरिएको स्थानीयले जानकारी दिएका छन् । हिमालको फेदमा रहेको सुशीला गौचन र नरप्रसाद गौचनको चौंरीगोठमा रहेका १५ चौंरी हिमपहिरोमा पुरिएर मरेको र १० वटा हराइरहेको बताइएको छ । जिल्ला प्रशासन कार्यालय मुस्ताङले भने सात वटा मरेको र अरु हराएको जनाएको छ । १४ वटा चौंरी भने जिउँदै भेटिएको स्थानीयले बताएका छन् । सहायक प्रमुख जिल्ला अधिकारी रामचन्द्र ढकालले घटनाबारे खोजबिन भइरहेको बताएका छन् । पहिरोमा परेर तीन वटा चौंरी घाइते भएका छन् ।

मुस्ताङ प्रहरी प्रमुख डीएसपी रामकुमार दानीका अनुसार शनिबार बिहान ४ बजे खसेको हिमपहिरोले थासाङ गाउँपालिका-२, न्याउँरीकोटमा रहेको सुशीला गौचन र नरप्रसाद गौचनको चौंरीगोठ पुरेको हो । गाईहरू पुरिए पनि गोठाला भने भागेर पहिरोबाट जोगिएको उनले बताए ।

के कति क्षति भयो भन्ने एकिन छैन । प्रहरी खटाएर हामी खोजी गर्दैछौं, उनले भने, कार्तिकमा पहिरो झरेकै ठाउँबाट अहिले पनि झरेको हो । उनले जलवायु परिवर्तनको असरले मुस्ताङको तापक्रम दैनिक बढ्दै गएकाले हिमालमा क्षति पुगेको हुनसक्ने बताएका छन् ।

तापक्रम बढेको छ । घाम लाग्ने वित्तिकै मान्छेहरु डराउँछन् । किसानहरूले गोठ सार्न थालेका छन्, उनले थपे, विज्ञहरू पनि यसलाई जलवायु परिवर्तनकै असर भन्छन् । गाउँलेलाई सोध्दा यस्ता घटना कहिलै नब्यहोरेको सुनाउँछन्, उनले भने । यसअघि कात्तिक अन्त्यतिर खसेको हिमपहिरोका कारण थासाङ-२, कोवाङ क्षेत्रस्थित जनआदर्श माविमा भागदौड मच्चिएको थियो । त्यस क्रममा ९ जना घाइते भएका थिए ।