११ चैत्र २०७८, शुक्रबार ०२:१६ बुधवार साप्ताहिक, नयाँबानेश्वर, काठमाण्डौं

नेपालले पीएनजीसँग खेल्दै

११ चैत, काठमाडौं । नेपाली राष्ट्रिय क्रिकेट टोलीले आज पपुवा न्युगिनी (पीएनजी) सँग प्रतिस्पर्धा गर्दैछ । त्रिवि क्रिकेट मैदानमा हुने नेपाल र पीएनजीबीचको खेल बिहान ९ बजे सुरु हुनेछ । आईसीसी विश्वकप डिभिजन टू अन्तर्गत पीएनजीसँग दुई एकदिवसीय खेल खेलेको नेपालले आज घरेलु मैदानमा पीएनजीसँग पहिलो एकदिवसीय सिरिज खेल्न लागेको हो ।

यूएईमा नेपालले पीएनजीसँग दुई एकदिवसीय खेल खेलेको थियो । नेपालले दुवै खेलमा जित निकालेको थियो । पहिलो खेलमा दुई विकेटको जित निकालेको नेपालले दोस्रो खेलमा ७ विकेटको जित निकालेको थियो ।

सन्दीप लामिछानेको कप्तानीमा मैदान उत्रने नेपाल सहज जित निकाल्दै सिरिजको सुरुवात गर्ने योजनामा छ । सन्दीपको कप्तानीमा नेपालले घरेलु मैदानमा पहिलो पटक खेल्दैछ । त्यसैले पनि सन्दीपका लागि आजको खेल महत्त्वपूर्ण रहनेछ ।

नेपालका मुख्य प्रशिक्षक पुबुदु दशानायकेले नेपालको मुख्य प्रतियोगिताअघि यो सिरिज निकै महत्त्वपूर्ण रहेको बताएका छन् । ‘ठूलो प्रतियोगिताको मुखैमा नेपालका लागि यो सिरिज निकै महत्त्वपूर्ण छ । झनै युवा खेलाडीहरूका लागि पनि सुनौलो अवसर छ । हामीले दुई टोली तयार पारेका छौँ । मैले यही युवा टोलीबाट उत्कृष्ट प्रदर्शनको अपेक्षा गरेको छु, पुबुदुले भने ।