१३ चैत्र २०७८, आईतवार ०१:२६ बुधवार साप्ताहिक, नयाँबानेश्वर, काठमाण्डौं

मतदाताको अन्तिम नामावली आज सार्वजनिक गरिंदै

१३ चैत,काठमाडौं । निर्वाचन आयोगले मतदाता नामावली आज सार्वजनिक गर्ने भएको छ । आयोगका प्रवक्ता शालिग्राम शर्मा पौडेलकाअनुसार सोही अनुसार मतपत्र छपाइ हुनेछ ।

आयोगले स्थानीय तहको निर्वाचनको मतपत्र जनक शिक्षा सामग्री लिमिटेडबाट छपाइ गर्ने निर्णय गरेको छ । गत शुक्रबारको बैठकले जनक शिक्षा सामग्रीलाई छाप्ने मेशिनलगायतका साधन चुस्त दुरुस्त राख्न निर्देशन पनि दिएको प्रवक्ता पौडेलले जानकारी दिए ।

‘यसअघि अनौपचारिक छलफल भइरहेको थियो । शुक्रबार मतपत्र जनक शिक्षा सामग्रीबाट छाप्ने निर्णय भएको छ । आवश्यक मेशिन, स्रोत साधान दुरुस्त राख्न निर्देशन दिने भन्ने भएको छ, उनले भने ।

उनकाअनुसार करिब दुई करोड मतपत्र छाप्ने तयारी छ । यसअघि पनि जनक शिक्षाबाटै मतपत्र छाप्ने गरिएको थियो । स्थानीय तहको निर्वाचन आगामी वैशाख ३० गते हुँदैछ । निर्वाचन नजिकिएसँग दलहरुले पनि तयारी तीब्र बनाउन थालेका छन् । अहिले दलहरुबीच चुनावी गठबन्धनको चर्चा चलिरहेको छ ।