२५ चैत्र २०७८, शुक्रबार ११:३१ बुधवार साप्ताहिक, नयाँबानेश्वर, काठमाण्डौं

एमालेको सूर्य चिह्न लिएर निर्वाचनमा जान्छौं : कमल थापा

२५ चैत, काठमाडौं । राप्रपा नेपालका अध्यक्ष कमल थापाले सूर्य चुनाव चिह्नलाई साझा बनाएर स्थानीय तह निर्वाचनमा जान सक्ने सम्भावना रहेको बताएका छन् ।

पार्टीको स्थानीय तह निर्वाचन घोषणापत्र र चुनाव चिह्न सार्वजनिक गर्नका लागि शुक्रबार चाबहिलमा आयोजित कार्यक्रममा अध्यक्ष थापाले नेकपा (एमाले) सँग तालमेल हुने सम्भावना रहेको जानकारी गराएका हुन् ।

एमालेसँग स्थानीय तहमा तालमेल हुने सम्भावना छ, छलफल चलिरहेको छ । सूर्य चिह्नलाई साझा बनाएर चुनावमा जान सकिन्छ,’ थापाले भने, अवस्था हेरेर अरु दलहरुसँग सहकार्य हुनसक्छ । आफ्नो पार्टीको संगठन विस्तार नभइसकेकाले जसरी पनि चुनावमा सहभागी हुने र चुनाव जित्नका लागि गठबन्धन आवश्यक रहेको थापाले बताएका छन् । उनले तालमेलका लागि स्थानीय तहको प्रकृति र अवस्थालाई आधार मानिने पनि प्रस्ट पारे ।

तर केन्द्रीय सदस्य भूपेन्द्रप्रसाद पोखरेलले तालमेल गरेर पनि चुनाव चिह्न राप्रपाकै ‘तीर’ लाई प्रचारप्रसारमा लैजानु पर्ने आवश्यक रहेकोमा जोड दिए । उनले भने, राप्रपा नेपाल पहिलो पटक ’तीर’ चुनाव चिह्न लिएर निर्वाचनमा जान लागेकोले हुँदा यसैलाई प्रचार गर्नुपर्छ । राप्रपाले हिन्दू राष्ट्र स्थापना, मुलुकमा विभिन्न मुद्दामा बन्द नगर्नेलगायत नीति र एजेण्डासहितको घोषणापत्र सार्वजनिक गरेको छ ।