२० जेष्ठ २०७९, शुक्रबार ०६:४५ बुधवार साप्ताहिक, नयाँबानेश्वर, काठमाण्डौं

इम्बोस्ड नम्बर प्लेट जडान नगरे साउन १ बाट कारबाही

२० जेठ, काठमाडौं । इम्बोस्ड नम्बर प्लेट जडान नगरे साउन १ गतेबाट कारवाही गरिने भएको छ । इम्बोस्ड नम्बर प्लेट जडान नगरिए आउँदो साउन १ गतेबाट कारबाही हुने यातायात व्यवस्था विभागले जनाएको छ ।

वागमती र गण्डकी प्रदेशमा दर्ता कायम रहेका सवारीहरुमा अनिवार्य रुपमा इम्बोस्ड नम्बर प्लेट जडान गर्नुपर्ने विभागले जनाएको छ ।
सवारी तथा यातायात व्यवस्था ऐन २०४९ को अनुसूची-२, भाग-२ र सवारी तथा यातायात व्यवस्था नियमावली २०५४ को नियम ४ को उपनियम (४) मा रहेको प्रावधान कार्यान्वयन गर्न लागिएको विभागले जनाएको छ । प्रदेश मातहतका यातायात व्यवस्था कार्यालयहरुमा दर्ता रहेका सबै सवारीमा चरणबद्ध रुपमा इम्बोस्ड नम्बर प्लेट जडान अनिवार्य गर्न ०७८ कात्तिक २२ को नेपाल राजपत्रमा सूचना प्रकाशन गरिएको थियो ।

वागमती प्रदेशको एकान्तकुना-ललितपुर र गुर्जुधारा-काठमाडौं र गण्डकी प्रदेशको पोखरा-कास्कीमा रहेका यातायात व्यवस्था कार्यालयहरुमा आवश्यक पूर्वाधार समेत तयार गरिएको विभागले जनाएको छ । सवारीहरुमा हालसम्म पनि इम्बोस्ड नम्बर प्लेट जडानसम्बन्धी संघीय कानुन बमोजिमको व्यवस्था तथा निणर्य कार्यान्वयन नभएकोप्रति विभागको गम्भीर ध्यानाकर्षण भएको छ , विभागले भनेको छ ।

०७९ साउन १ गतेपछि ट्राफिक प्रहरीबाट सडक अनुगमन गरिने र तोकिए अनुसार इम्बोस्ड प्लेट जडान नगरिएको पाइएमा सवारी तथा यातायात व्यवस्था ऐन २०४९ बमोजिम कारबाही हुने विभागले जनाएको छ ।