२३ असार २०७९, बिहीबार १४:१० बुधवार साप्ताहिक, नयाँबानेश्वर, काठमाण्डौं

वायु सेवा निगमका कार्यकारी अध्यक्ष अधिकारीलाई निलम्बन नगर्न सर्वोच्चको आदेश

२३ असार, काठमाडौँ । सर्वोच्च अदालतले मन्त्रिपरिषद्को निर्णयबाट हटाइएका नेपाल वायु सेवा निगमका कार्यकारी अध्यक्ष युवराज अधिकारीलाई फर्काइ दिएको छ ।

सर्वोच्च अदालतका न्यायाधीश तिलप्रसाद श्रेष्ठको एकल इजलासले आगामी असार २८ गते अर्को पेसी राख्दै त्यतिञ्जेलसम्म अधिकारीलाई काम गर्न दिनेगरी अल्पकालीन अन्तरिम आदेश जारी गरेको हो ।

अधिकारीले २०७८ कात्तिक ११ गते निगमको कार्यकारी अध्यक्षमा नियुक्त गरिएको थियो । उनलाई ४ वर्षका लागि नियुक्त गरिएको भन्दै सर्वोच्चले कार्यकारी अध्यक्षमा उनलैलाई निरन्तरता दिन अल्पकालीन अन्तरिम आदेश जारी गरेको हो ।
मन्त्रिपरिषद्को असार ६ गतेको बैठकले निगमका कार्यकारी अध्यक्ष अधिकारीलाई निलम्बन गर्ने निर्णय गरेको थियो । अधिकारीको तत्कालीन मन्त्री प्रेम आलेसँग झगडा परेको अडियो सार्वजनिक भएको थियो । त्यस अडियोमा आलेले अधिकारीलाई हातपात गरेको पनि सुन्न सकिन्थ्यो ।

त्यसपछि आलेले मन्त्रिपरिषद्मा प्रस्ताव लगेर छानबिन गर्ने भन्दै अधिकारीलाई निलम्बन गर्ने निर्णय गराएका थिए । तर एकीकृत समाजवादी सचिवालयको जेठ २२ गतेको निणर्यअनुसार अधिकारीलाई निलम्बन प्रस्ताव लैजाने आले मन्त्रीबाटै फिर्ता भइसकेका छन् । अहिले जीवनराम श्रेष्ठ पर्यटनमन्त्रीका रुपमा छन् ।