२७ आश्विन २०७९, बिहीबार ०६:०० बुधवार साप्ताहिक, नयाँबानेश्वर, काठमाण्डौं

एमालेका बागीहरु स्वतः निष्काशित, प्रस्तावक र समर्थकलाई पनि कारबाही

२७ असोज,काठमाडौं । नेकपा एमालेका आधिकारिक उम्मेदवारविरुद्ध उम्मेदवारी दिने बागी उम्मेद्वारहरु स्वतः पार्टीबाट निष्काशित हुने भएका छन् । उम्मेदवारी दिने मात्रै नभएर उम्मेद्वारलाई प्रस्ताव गर्ने र समर्थन गर्ने पनि निष्काशित हुने पार्टी उपप्रमुख तथा प्रचारप्रसार विभाग प्रमुख विष्णु रिजालले जानकारी दिए ।

उनले सामाजिक सञ्जालमार्फत लेखेका छन् ‘हाम्रो पार्टी नेकपा (एमाले) का उम्मेद्वारहरूका विरुद्धमा उम्मेद्वारी दिने, समर्थन र प्रस्ताव गर्नेहरू कमिटी / पार्टी सदस्यहरू स्वतसः पार्टीबाट निष्काशित हुने नीतिगत निर्णय यसअघि नै भइसकेको छ र यस सम्बन्धमा थप निर्णय गरिरहनु पर्ने छैन । पार्टी कमिटी र सदस्यबाट उनीहरूको अभिलेख सम्बन्धित कमिटीहरूले हटाउने छन् ।

रिजालका अनुसार स्थायी कमिटी सदस्य घनश्याम भुसाल,प्रभु साह र केन्द्रीय सदस्य कुन्दन कुशवाह र गंगा चौधरीले पार्टीका उम्मेदवारविरुद्ध बागी उम्मेदवारी दिएका छन् । उनीहरु स्वतः अब एमालेको केन्द्रीय कमिटी लगायत साधारण सदस्यबाट निष्कासनमा परेका छन् ।

भुसालले रुपन्देही क्षेत्र नम्बर १ मा बागी दिएका छन् भने साहले रौतहटमा३ ३ मा । उनीहरुलाई सत्ता गठबन्धनले सघाउँदैछ । त्यस्तै कुशवाह रौतहट ३ मा प्रदेश सभातर्फ स्वतन्त्र उम्मेदवार छन् भने गंगा थारुले दाङ १ मा बागी दिएकी छन् । त्यस्तै निवर्तमान सांसद रामवीर मानन्धरले काठमाडौं ७ मा बागी दिएका छन् । यीबाहेक अर्थ तथा योजना विभागका सचिव योगेन्द्र शाहीले एमाले छाडेर माओवादीबाट दैलेखेका प्रदेश सभाको उम्मेदवारी दिएका छन् ।