४ कार्तिक २०७९, शुक्रबार १०:३३ बुधवार साप्ताहिक, नयाँबानेश्वर, काठमाण्डौं

चार घण्टा सर्वसाधरणसँग केपी ओलीको टेलिफोन संवाद, आए थरिथरिका सुझाव

४ कात्तिक, काठमाडौं । प्रमुख प्रतिपक्ष नेकपा एमालेका अध्यक्ष केपी शर्मा ओलीले सर्वसाधारणसँग प्रत्यक्ष टेलिफोन संवाद गर्नुभएको छ । ओलीले पार्टी मुख्यालय च्यासलबाट टेलिफोनमा जनतासँग संवाद गर्नुभएको हो ।

सर्वसाधारणसँग प्रत्यक्ष जोडिन ओलीले फेसबुकमार्फत नाम र नम्बर टिपाउन सार्वजनिक रूपमा आव्हान गर्नुभएको थियो । सोही क्रममा टिपाएकामध्ये गोलाप्रथाबाट नाम छनोट गरी ओलीले टेलिफोन गरी संवाद गर्नुभएको हो । संवादको क्रममा ओलीले आसन्न निर्वाचनको सन्दर्भमा सर्वसाधारणसँग सुझाव लिनुभएको छ ।

ओलीसँग कुरा गर्न इच्छुकले मंगलबार साँझदेखि बिहीबार मध्यान्हसम्म नाम र नम्बर टिपाएका थिए । ‘तपाईँहरूसँग भएका कुराकानीले म उत्साहित छु । दुई लाख ९ हजार एक सय १६ जनाले नाम टिपाउनु भएकोले मैले सबैसँग कुरा गर्न पाइनँ । म क्रमैसँग कुरा गर्दै जानेछु , ओलीले फेसबुकमा लेख्नुभएको छ ।

ओलीको सचिवालयका अनुसार उहाँले आज करिब ४ घण्टा बसेर कुराकानी गर्नुभएको छ । टेलिफोन नम्बर र नामहरू तयार पारेर छनौट गर्दै ओलीले फोन गर्नुभएको हो । सुझावका क्रममा उहाँलाई थरिथरिका सुझाव दिएका छन ।