२७ पुष २०७९, बुधबार ०४:०७ बुधवार साप्ताहिक, नयाँबानेश्वर, काठमाण्डौं

सुदूरपश्चिममा सभामुखको मनोनयन आज

२७ पुस, धनगढी । सुदूरपश्चिममा मंगलबार प्रदेश सभाको सभामुखका लागि मनोनयन दर्ता हुने भएको छ ।

प्रदेश सभा सचिवालयले निर्वाचन प्रयोजनका लागि जारी गरेको सूचनाअनुसार मंगलबार बिहान साढे १० देखि दिउँसो साढे २ बजेसम्म सभामुखका लागि मनोनयन दर्ता गर्ने समय दिइएको छ ।

निर्धारित समयभित्र सभामुखमा उम्मेदवारी दिने विषयमा दलहरू आन्तरिक छलफलमा जुटेका छन् । एमाले नेतृत्वको गठबन्धनमा भागबन्डाका क्रममा सभामुख पाउने माओवादी केन्द्रले अहिलेसम्म उम्मेदबारको विषयमा टुंगो नलागेको जनाएको छ ।

संसदीय दलका नेता खगराज भट्टले सभामुखको उम्मेदवार कसलाई बनाउने भन्ने कुराको टुंगो लागिनसकेको बताउँदै आफूहरु छलफलमै रहेको जानकारी दिए ।
अहिले काठमाडौंबाट फर्किरहेको बताउँदै भट्टले धनगढी पुगेपछि दलको बैठक बसेर उक्त कुरा टुंग्याउने बताए ।

संसदीय दलका नेता कमल शाहले बिहान ८ बजेका लागि बैठक बोलाएका हुन् । बैठकमा प्रदेश सरकार गठनलगायतका विषयमा छलफल हुने प्रदेश सभा सदस्य मेघराज खड्काले जानकारी दिए ।

सुदूरपश्चिममा मुख्यमन्त्रीमा दाबी पेस गर्ने समय आजै साँझ ५ बजे सकिंदैछ भने सभामुखको निर्वाचन भोलि दिउँसो १ बजे हुने प्रदेश सभा सचिवालयले जनाएको छ ।