१९ बैशाख २०८०, मंगलवार ०६:३० बुधवार साप्ताहिक, नयाँबानेश्वर, काठमाण्डौं

क्रिकेट टोलीलाई वधाई दिंदै प्रधानमन्त्रीले भने, ‘प्राेत्साहन र पुरस्कृत गरिने छ’

१९ वैशाख, काठमाडौं । प्रधानमन्त्री पुष्पकमल दाहाल ‘प्रचण्ड’ ले एसीसी प्रिमियर कपको उपाधि जित्न सफल नेपाली क्रिकेट टोलीलाई बधाइ दिएका छन् । प्रधानमन्त्री प्रचण्डले शुभकामना तथा बधाइ दिँदै यूएईविरुद्ध शानदार जित निकालेको नेपाली टोलीलाई बधाइ दिएका हुन् ।

एसीसी प्रिमियर कप जित्नु अर्को ठूल सफलता भएको भन्दै प्रधानमन्त्री प्रचण्डले भनेका छन्, ‘एसीसी प्रिमियर कप क्रिकेटको एसिया कप जित्न सफल भएकोमा नेपाली क्रिकेट टोलीलाई हार्दिक बधाइ ज्ञापन गर्दछु । प्रधानमन्त्रीले विजेता खेलाडीहरूलाई सरकारको तर्फबाट थप प्रोत्साहन र पुरस्कृत गर्ने प्रतिवद्धता जनाएका छन् ।

प्रधानमन्त्रीले भनेका छन्, ‘देशको पहिचान र प्रतिष्ठा एवं नेपालीलाई उर्जा प्रदान गर्ने खेलाडीहरूको योगदानप्रति उच्च सम्मान गर्दै सरकारको तर्फबाट थप प्रोत्साहन र पुरस्कृत गर्ने प्रतिवद्धता व्यक्त गर्दछु । गुल्शन झाको अर्धशतकप्रेरित नेपाल एसीसी मेन्स प्रिमियर कपको फाइनलमा यूएईलाई सात विकेटले पराजित गर्दै एसिया कपमा छनोट भएको छ । त्रिवि क्रिकेट मैदानमा सोमबार सुरु भएर मंगलबार टुङ्गिएको फाइनलमा यूएईविरुद्ध शानदार जित निकालेको हो ।

टस हारेर ब्याटिङ थालेको यूएईले ३३.१ ओभरमा सबै विकेट गुमाउनुअघि एक सय १७ रनको योगफल तयार गरेको थियो । जवाफी ब्याटिङमा उत्रिएको नेपालले ३०.३ ओभरमा मात्रै तीन विकेट गुमाएर एक सय १८ रनसहित लक्ष्य पूरा गर्दै एसिया कपमा छनोट भएको हो ।