४ असार २०८०, सोमबार ०९:३० बुधवार साप्ताहिक, नयाँबानेश्वर, काठमाण्डौं

निष्कर्षबिहीन टुङ्गियो पहिचानवादी र कोशी प्रदेश सरकारबीचको वार्ता

४ असार,काठमाडौं। पहिचानवादी र कोशी प्रदेश सरकारबीचको वार्ता निष्कर्ष बिहीन टुंगिएको छ । चार घण्टाभन्दा बढी चलेको बैठकमा कुनै सहमती नभएपछि वार्ता छिट्टै अर्को वार्ता गर्ने सहमतिमा टुंगिएको हो ।

विराटनगरको विग होटलमा आज बिहान ९ बजेदेखि सुरु भएको वार्ता दिउँसो १ बजेसम्म चलेको थियो । वार्ता सकिएपछि पत्रकारहरुसँग कुरा गर्दै दुबै पक्षले छलफल सौहार्दपूर्ण भएको र फेरि वार्तामार्फत नै अघि बढ्ने बताएका छन् । उनीहरुले दुबै पक्षको सल्लाहमा वार्ताको अर्को मिति तोक्ने सहमति भएको पनि बताए ।

सरकारी वार्ता टोलीका संयोजक मन्त्री दिलकुमार मेन्याङ्बोले वार्तामा विषय प्रवेश भएको र पुनः वार्तामा बस्ने सहमति भएको बताए । आन्दोलनरत पक्षका वार्ता टोली सदस्य कुमार लिङदेनले वार्तामा विषय प्रवेश भएको र फेरि बस्ने सहमति भएको जानकारी दिए ।

कोशी नामकरणको विरुद्धमा आन्दोलनरत पक्षसँग प्रदेश सरकारले औपचारिक वार्ता आव्हान गरेर वार्तामा बसेको यो पहिलो पटक हो । ‘कोशी’ नाम खारेज गरी जातीय पहिचानका आधारमा प्रदेशको नामकरण गरिनुपर्ने पहिचान पक्षधरहरुले माग राख्दै आएको छ ।

प्रदेशसभाको दुई तिहाइभन्दा बढी बहुमतले गत फागुन १७ गते तत्कालीन प्रदेश १ को नाम कोसी राखेको थियो । नामकरणप्रति असन्तुष्टि जनाउँदै पहिचान पक्ष धरले पहिचानको आधारमा नाम राख्नु पर्ने माग गर्दै गत फागुनदेखि नै आन्दोलन गरिहेका छन् । आन्दोलनकारीको मुख्य माग भनेकै प्रदेश १ को पुनः नामकरण गर्नुपर्ने हो । संयुक्त संघर्ष समिति गठन गरेरै पहिचान पक्षधरहरुले आन्दोलन जारी राखेको छ ।