५ असार २०८०, मंगलवार ०८:५१ बुधवार साप्ताहिक, नयाँबानेश्वर, काठमाण्डौं

अमेरिकाविरुद्ध नेपालको उत्कृष्ट सुरूवात, करण केसीले लिए चार विकेट

५ असार,काठमाडौं । आईसीसी विश्वकप छनोट खेलमा टस जितेर फिल्डिङ रोजेको नेपालले अमेरिका विरुद्ध राम्रो उत्कृष्ट सुरुवात गरेको छ । जिम्बावेको राजधानी हरारेस्थित ताकासिंगा क्रिकेट क्लबमा नेपालले टस जितेर बलिङ रोजेपछि पहिले ब्याटिङ गरेको अमेरिकाले सुरुवाती चार विकेट गुमाएको छ।

पावर प्ले नसकिदै नेपालले अमेरिकाको चार विकेट लिएको छ । चारै विकेट करण केसीले लिएका हुन् । करणले दोस्रो ओभरको पाँचौं र छैटौं बलमा लगातार विकेट लिएका छन् ।

अमेरिकाका ओपनर स्टेभिन टेलर ४ रन, मुकामाला शून्य, कप्तान आरोन जोन्स २ रन र केन्जिगे १ रनमा आउट भएका छन्। चारै जनालाई नेपालका करण केसीले आउट गरे। करणले १.५ ‌ओभरमा टेलरलाई एलबिडब्लूको धरापमा पार्दा १. ६ ओभरमा मुकामालालाई आरिफ शेखबाट क्याच गराए।

यस्तै ७. ५ ओभरमा जोन्सलाई करणले कुशल भुर्तेलबाट क्याच गराए। यस्तै करणले १ रनमा आरिफबाट क्याच गराउँदै उत्कृष्ट बलिङको नमुना देखाए। त्यतिबेला अमेरिकाले ९. २ ‍ओभर ४ विकेट गुमाउँदा १८ रन बनाएको स्थिति थियो।

खेलमा नेपालले एक परिवर्तन गरेको छ। सोमपाल कामीको स्थानमा ललितनारायण राजवंशीलाई स्थान दिइएको छ।

सोमपाल यसअघि जिम्बावेविरुद्धको खेलमा घाइते भएका थिए।

नेपाल र अमेरिका दुवै टोली आफ्नो पहिलो खेलमा पराजित भएका थिए । नेपाललाई पहिलो खेलमा बलियो प्रतिद्वन्द्वी जिम्बाब्वेले आठ विकेटले हराएको थियो । अमेरिकालाई भने पहिलो खेलमा वेस्ट इन्डिजले हराएको थियो । अंक तालिकाको नेट रनरेटमा भने नेपालभन्दा अमेरिका अगाडि रहेको छ ।