२८ श्रावण २०८०, आईतवार ०६:३४ बुधवार साप्ताहिक, नयाँबानेश्वर, काठमाण्डौं

सिँचाइ र सडक विभागमा ताला लगाउने ४५ निर्माण व्यावसायी प्रहरीको नियन्त्रणमा

२८ साउन, काठमाडौं । निर्माण व्यवसायी महासंघका वरिष्ठ उपाध्यक्ष आङदोर्जे लामासहित ४५ जनालाई प्रहरीले नियन्त्रणमा लिएको छ। आज (आइतबार) ललितपुरको चाकुपाटस्थित सडक विभाग र जावलाखेलस्थित सिँचाइ विभागमा ताला लगाउन खोजेपछि ४५ जनालाई प्रहरीले नियन्त्रणमा लिइएको हो ।

जिल्ला प्रहरी परिसर ललितपुरका एसएसपी शिद्धिविक्रम शाहका अनुसार उनीहरूलाई प्रहरीले ताला लगाउनबाट रोक्न खोजेको थियो । तर जबरजस्ती ताला लगाएको भन्दै प्रहरीले दुई कार्यालयबाट ४५ जनालाई नियन्त्रणमा लिएको हो । उनीहरूले तालाबन्दीसँगै ती कार्यालयमा धर्ना पनि दिएका थिए ।

महासंघले आफ्ना मागहरू पूरा गर्नुपर्ने भन्दै विभिन्न चरणमा आन्दोलन गर्दै आएको छ । उनीहरूले सरकारसँग काम गरेबापतको रकम भुक्तानीको माग गरेका छन् । त्यस्तै ठेक्काको म्याद थप गर्नुपर्ने पनि उनीहरूको माग छ । उनीहरूले यस्ता माग राखेर काठमाडौंमा सिठी जुलुस, डोजर जुलसलगायत गरिसकेका छन् ।