६ भाद्र २०८०, बुधबार ०६:५६ बुधवार साप्ताहिक, नयाँबानेश्वर, काठमाण्डौं

सदनको अवरोध हटाउन दलहरूबीच दुई बुँदे सहमति

६ भदौ, काठमाडौं । संसदको गतिरोध अन्त्यका लागि दलहरुबीच दुई बुँदे सहमति भएको छ । प्रधानमन्त्री कार्यालय सिंहदरबारमा जारी बैठकमा सहमति जुटेको बैठकमा सहभागी एक सदस्यले बताए ।

प्रधानमन्त्री कार्यालय, सिंहदरबारमा बसेको बैठकमा नेपाली कांग्रेस, नेकपा एमाले, माओवादी केन्द्र, राष्ट्रिय स्वतन्त्र पार्टी, राप्रपा र जनता समाजवादी पार्टीका नेताहरु उपस्थित थिए । बैठकमा सहभागी एक नेताका अनुसार दुई बुँदे सहमतिको मस्यौदा तयार भएको छ । केहीबेरमा औपचारिक रुपमा हस्ताक्षर हुनेछ ।

उच्चस्तरीय आयोग गठनको माग गर्दै एमालेले १० साउनदेखि संसद बैठक अवरुद्ध गर्दै आएको छ । संसदको अर्को बैठक आजै ३ बजेका लागि बोलाइएको छ । ‘सहमति भएको छ, ती सदस्यले भने । बैठक अहिले पनि जारी रहेकाले सहमतिका बुँदा केहीबेरमा सार्वजनिक गरिने ती सदस्यले बताए । १० साउनदेखि सुन प्रकरणको छानबिन गर्न उच्चस्तरीय समितिको माग राख्दै प्रमुख प्रतिपक्षी दलले सदन अवरोध गर्दै आएको थियो । आज दिउँसो ३ बजे संसद बैठक बस्दैछ ।