१६ भाद्र २०८०, शनिबार १०:०८ बुधवार साप्ताहिक, नयाँबानेश्वर, काठमाण्डौं

प्रधानमन्त्रीले कुर्सीबाट नहट्ने आशिर्वाद लिन भारतलाई जलस्रोत सुम्पिए : प्रदीप ज्ञवाली

१६ भदौ,बुटवल । प्रमुख प्रपिक्षी नेकपा एमालेका उपमहासचिव प्रदीप ज्ञवालीले भारत भ्रमणको क्रममा प्रधानमन्त्री पुष्पकमल दाहाल प्रचण्डले कुर्सी बचाउनका लागि नेपालका जलस्रोत भारतलाई बुझाएको आरोप लगाएका छन् ।

आज (शनिबार) एमाले लुम्बिनी प्रदेशको अधिवेशनलाई सम्बोधन गर्दै उपमहासचिव ज्ञवालीले कुर्सीका लागि जस्तासुकै कागजमा पनि सहिछाप गर्न तयार हुने मान्छेहरू अहिलेको सरकारमा रहेको बताए । उनले अहिले आफ्नो कुर्सीको दिर्घायुका लागि जस्तासुकै कागजमा पनि सहिछाप गर्न तयार मान्छेहरु सरकारमा रहेको उनले बताए । प्रधानमन्त्री प्रचण्डले भारत भ्रमणका क्रममा कुनै पनि राष्ट्रिय हितका पक्षमा कुनै आवाज उठाउन नसकेको ज्ञवालीको भनाइ छ ।

‘हामीले देख्यौं अस्ति मात्र प्रधानमन्त्री पुष्पकमल दाहाल ‘प्रचण्ड’ भारत भ्रमणमा जानुभयो । नेपालका राष्ट्रिय हितका पक्षमा कुनै आवाज उठाउन सक्नु भएन । हामीलाई भैरहवा एयरपोर्टको नयाँ रुट, हामीलाई २७ वर्षदेखि अलपत्र पञ्चेश्वरमा ब्रेक थु, ज्ञवालीले भने, ‘हामीलाई चाहिएको थियो अपर कर्णालीमा ब्रेक थु । उहाँले केही पनि गर्नु भएन । बरु उल्टै भारतीय प्राथमिकताका जलस्रोत तम शरणमः गर्दै उहाँले सुम्पिएर आउनु भयो ।

कुर्सीबाट नहट्ने आशिर्वाद लिनका लागि राष्ट्रिय हितसँग सम्झौता गरेर आएको उनले आरोप लगाए । ‘उहाँले कुर्सीमा दिर्घायु भवः भन्ने आशिर्वाद पाउन राष्ट्रिय हितसँग सम्झौता गरेर आउनु भयो,’ ज्ञवालीले भने । ज्ञवालीले अहिले राष्ट्रिय हितको अभियान अप्ठेरोमा परेको पनि बताए । उनले एमाले एकतावद्ध छ भन्ने सन्देश लुम्बिनीबाट दिनुपर्ने पनि बताए । ‘लुम्बिनीबाट हामीले एकतावद्ध एमालेको सन्देश दिनुछ । प्रतिस्पर्धा नहुने होइन, तर कतिबेला कुन कुरा गर्ने, कतिबेला कुन गीत बजाउने भन्ने ध्यान दिनुपर्छ, उनले भने ।