२७ चैत्र २०८२, शुक्रबार १६:१७ बुधवार साप्ताहिक, नयाँबानेश्वर, काठमाण्डौं

प्रतिनिधिसभा २०८२ को पहिलो अधिवेशन सम्पन्न, ९ दिनमा महत्वपूर्ण संसदीय गतिविधि

काठमाडौं — प्रतिनिधिसभा २०८२ को पहिलो अधिवेशन ९ दिनमै सम्पन्न भएको छ। चैत १९ गते सुरु भएर चैत २७ गते सकिएको अधिवेशनमा सभामुख र उपसभामुख चयनदेखि संसदीय समिति गठनसम्मका महत्वपूर्ण काम भएका छन्।

अधिवेशन अवधिमा डोलप्रसाद अर्याल प्रतिनिधिसभाको सभामुखमा निर्विरोध निर्वाचित भएका छन्। उपसभामुख पदमा भएको निर्वाचनमा राप्रपाकी सरस्वती लामा र रुबीकुमारी ठाकुरबीच प्रतिस्पर्धा भएको थियो। राष्ट्रिय स्वतन्त्र पार्टी (रास्वपा) को समर्थन पाएकी ठाकुर उपसभामुखमा निर्वाचित भएकी हुन्।

यस अधिवेशनले २१ सदस्यीय कार्यव्यवस्था परामर्श समिति गठन गरेको छ भने प्रतिनिधिसभाअन्तर्गत १६ वटा विषयगत समिति र दुई वटा संयुक्त समिति गठन गरिएको छ। राष्ट्रिय सभाका विषयगत समितिहरू यसअघि नै गठन भइसकेका छन्।

प्रतिनिधिसभा नियमावली निर्माणका लागि १५ सदस्यीय मस्यौदा समिति पनि गठन गरिएको छ। उक्त नियमावली आगामी अधिवेशनमा पारित भएपछि कार्यान्वयनमा आउनेछ।

यस अवधिमा प्रतिनिधिसभामा आकस्मिक समय, शून्य समय र विशेष समयमार्फत सांसदहरूले समसामयिक विषयमा सरकारको ध्यानाकर्षण गराएका थिए।

सभामुखले संसदीय समितिका सभापतिको निर्वाचन आगामी वैशाख ४ गतेका लागि घोषणा गरेका छन्।

छोटो अवधिमा सम्पन्न भएको अधिवेशनले संसदीय संरचना निर्माणका महत्वपूर्ण काम अघि बढाएको भए पनि समितिका सभापतिको चयन भने बाँकी रहेको छ।