४ जेष्ठ २०८३, सोमबार ०४:३६ बुधवार साप्ताहिक, नयाँबानेश्वर, काठमाण्डौं

नदीबाट सिधै ढुंगा–बालुवा निकालेर पुल निर्माण गरेको आरोप

काठमाडौं । बारा-पथलैया–निजगढ सडकखण्डअन्तर्गत दूधौला पुल निर्माणका क्रममा ठेकेदार कम्पनीले अवैध रूपमा नदीजन्य सामग्री उत्खनन गरेको आरोप लागेको छ। जीतपुरसिमरा उपमहानगरपालिकाले नदीबाट ढुंगा, गिटी, बालुवा र माटो निकालिरहेको अवस्थामा निर्माण कम्पनीका डोजर र टिप्पर नियन्त्रणमा लिएको जनाएको छ।

उपमहानगरपालिकाले गरेको स्थलगत अनुगमनमा पुलदेखि करिब ५०० मिटर दक्षिणतर्फबाट ठूलो परिमाणमा नदीजन्य सामग्री उत्खनन गरिएको भेटिएको थियो। प्राविधिक नापजाँचका आधारमा १ लाख ५७ हजार ५८१ घनफिट सामग्री निकालिएको निष्कर्ष निकाल्दै उपमहानगरपालिकाले कम्पनीसँग १६ लाख २ हजार ६०७ रुपैयाँ राजस्व तथा जरिवाना माग गरेको छ।

अनुगमन समितिका संयोजक कृतिराज सुवेदीले राजस्व नतिरी सिधै नदी दोहन गरिएको बताए। स्थानीयवासीका अनुसार निकालिएको सामग्री पुल आसपासको संरचना निर्माणमा प्रयोग गरिएको थियो।

उपमहानगरपालिकाले सडक विभागलाई समेत पत्राचार गर्दै राजस्व संकलनमा सहयोग मागेको छ। तर निर्माण कम्पनीले भने आफूहरूले कुनै चोरी नगरेको दाबी गर्दै जरिवाना नतिर्ने अडान लिएको छ।

तीन वर्षभित्र सक्नुपर्ने पुल निर्माण आठ वर्षपछि अन्तिम चरणमा पुगेको भए पनि विवादका कारण पुल सञ्चालनमा थप ढिलाइ हुने संकेत देखिएको छ।