५ जेष्ठ २०८३, मंगलवार ०९:२४ बुधवार साप्ताहिक, नयाँबानेश्वर, काठमाण्डौं

आगामी आर्थिक वर्ष २०८३/८४ को बजेट तयारीबारे विज्ञसँग छलफल गर्ने वित्त समिति निर्णय

काठमाडौं । प्रतिनिधिसभा अन्तर्गतको वित्त समितिले आगामी आर्थिक वर्ष २०८३/८४ को बजेट निर्माण प्रक्रियाबारे विज्ञहरूसँग परामर्श गर्ने निर्णय गरेको छ ।

समितिको चौथो बैठकले बजेट तयारीका विषयमा सरकारलाई सुझाव तथा सिफारिस दिन आगामी बैठकमा आमन्त्रण गरिने ८ जना विज्ञहरूको नाम स्वीकृत गरेको हो ।

समिति सभापति कृष्णहरि बुढाथोकीले समितिअन्तर्गत गठन गरिएका विषयगत उपसमितिहरूले विभिन्न क्षेत्रसँग सम्बन्धित समस्या, कमजोरी तथा निष्कर्ष समेटिएका प्रारम्भिक प्रतिवेदन पेश गरिसकेको जानकारी दिए । बैठकमा सांसदहरूले वर्तमान बजेट तथा बजेट निर्माण प्रक्रियाका विषयमा पनि विभिन्न चासो र प्रश्न उठाएका थिए ।

समितिले उपसमितिहरूलाई आफ्नो कार्यक्षेत्रसँग सम्बन्धित थप ५ देखि १० वटा सुझाव तयार गरी आगामी बैठकमा पेश गर्न निर्देशन दिएको छ । विज्ञहरूको सुझाव, उपसमितिका प्रतिवेदन तथा सांसदहरूले उठाएका विषयका आधारमा सरकारलाई थप निर्देशन र सुझाव दिने तयारी गरिएको सभापति बुढाथोकीले बताए ।