९ मंसिर २०७२, बुधबार ०९:०२ बुधवार साप्ताहिक, नयाँबानेश्वर, काठमाण्डौं

भारतीय राजदूतले प्रमलाई भने, ‘तपाईंका मानिसलाई सम्झाउनूस्’

काठमाडौं । बाहिर तिक्त सम्बन्ध भए पनि व्यक्तिगत रूपमा प्रधानमन्त्री केपी ओली र भारतीय राजदूत रणजीत रायबीच राम्रो सम्बन्ध छ भन्ने कुरा शुक्रबार रातीसम्म बालुवाटार बसेकाहरूले राम्रैसँग बुझ्न पाए । भेट्न आएकाहरूको भीडलाई छोडेर प्रधानमन्त्री ओलीले राजदूत रायसँग करिब डेढ घन्टा कुराकानी गर्नुभएको थियो ।
उक्त भेटका लागि भारतीय राजदूत राय स्वयम्ले समय मागेका थिए । औपचारिक भेटका लागि सरकारी कार्यालय ठीक हुने भए पनि उनले विशेष कुरा गर्न चाहेको बुझेपछि निवासमा त्यो पनि रातीको समय मिलाइएको थियो । आधा घन्टाका लागि भनेर तय गरिएको भेटघाट डेढ घन्टासम्म तन्किँदा अरू धेरै त के कुरा भए थाहा हुन सकेन, तर त्यसपछि भेटेका एक मन्त्रीसँग प्रधानमन्त्री ओलीले भने अनुसार, भारतीय राजदूतले सीमामा देखिएको समस्या आफ्ना लागि समेत बोझ भएको खुलेरै बताएछन् । उनको भनाइ रहेछ, ‘हामीलाई नै बोझ भइसक्यो । तपाई आफ्ना मानिसलाई सम्झाउनूस् ।’ आफ्ना मानिस भनेर उनले महन्थ ठाकुर, उपेन्द्र यादवहरूलाई भन्न खोजेका हुन् । यसबाट निकालिएको
निष्कर्ष के छ भने नाकाबन्दी गरिदिनुपर्‍यो भनेर उनीहरूले नै भारतीय पक्षमाथि दबाब दिइरहेका छन् । हात हालिसकेपछि कुनै निष्कर्ष ननिकालेरै यत्तिकै पछि फर्किंदा भारतको थप बेइज्जत हुने र नेपालमा यसले भनेको अब केही पनि लाग्दैन भन्ने प्रमाणित हुने भएका कारण लाज छोप्ने कुनै सम्झौता नभएसम्म भारत पछि फर्किन नसक्ने संकेत पनि राजदूत रायले कूटनीतिक रूपमा उनले गरेका थिए ।
प्रधानमन्त्री ओलीले नेपालको शदिऔंदेखिको छिमेकी भारतले कुनै एक जना व्यक्ति, सानातिना दल र समुदायसँग नभई सिंगो नेपालसँग सम्बन्ध राख्नुपर्ने सम्झाउनुभएको थियो ।