२९ पुष २०७२, बुधबार ०८:१३ बुधवार साप्ताहिक, नयाँबानेश्वर, काठमाण्डौं

प्रतिबद्धता पूरा गरेर चीनतिर

काठमाडौं । पहिल्यैदेखि संविधान नबनेसम्म विदेश जाने दौडधुप त्याग्न नेताहरूलाई सुझाव दिँदै आएका संविधानसभाका पूर्वअध्यक्ष सुवास नेम्वाङ आफू भने पुरानो प्रतिबद्धता पूरा गरेर नयाँ संविधान जारी भएपछि चीन भ्रमणमा जाने भएका छन् ।
यही माघ ३ गते नेकपा (एमाले) संसदीय दलका उपनेतासमेत रहेका नेम्वाङ नेतृत्वको १५ सदस्यीय टोली सर्वदलीय टोलीउच्चस्तरीय भ्रमणका लागि चीन जान लागेको हो । नेता नेम्वाङले संविधान निर्माण प्रक्रिया गाँठो पर्दै गएपछि पहिलो संविधानसभाको बीचको अवधिबाट आफू संविधान जारी नभएसम्म विदेश भ्रमणमा नजाने भन्दै अन्य शीर्ष नेताहरूलाई पनि संविधान निर्माणमा अवरोध हुनेगरी विदेश नजान आग्रह गरेका थिए ।
पहिलो संविधानसभाले संविधान बनाउन सकेन भने दोस्रो संविधानसभाका लागि निर्वाचन भयो र त्यो कार्यकालभरि पनि नेता नेम्वाङ विदेश भ्रमणमा गएनन् । संसद् स्रोतका अनुसार करिब चार वर्षपछि हुन लागेको नेम्वाङको भ्रमण टोलीमा सांसदहरू रबीन्द्र अधिकारी, रामहरि खतिवडा, किरण यादव, उमेश श्रेष्ठ, इच्छाराज तामाङ, भरतकुमार शाह, आशा कोइरालासहित १२ जना सांसद र संसद् सचिवालयका ३ जना कर्मचारी रहेको बुझिएको छ । भ्रमणटोलीको नामावली र भ्रमण कार्यक्रमबारे आफूलाई अहिलेसम्म विस्तृत जानकारी नदिएको नेता नेम्वाङले बताए । ‘पहिल्यैदेखि बोलाइरहेका थिए, अवसर मिलेको थिएन, सबैले बोलाएकामा चीन पहिला भयो’– उनले भने ।