९ फाल्गुन २०७७, आईतवार ०५:०८ बुधवार साप्ताहिक, नयाँबानेश्वर, काठमाण्डौं

के हुदैछ आज प्रदेश १ को प्रदेशसभा बैठकमा ?

काठमाडौं, ९ फागुन । प्रदेश १ को जारी सातौ हिउँदे अधिवेशनको तेस्रो बैठक आजका लागि बोलाइएको छ । तर आजको प्रदेशसभा बैठक सरकारले नै अवरोध गर्ने भएको छ ।

संसद् सचिवालयले आजको बैठकमा अविश्वासको प्रस्ताव टेवल गर्ने तयारी गरेपछि सत्तारुढ नेपाल कम्युनिस्ट पार्टी (नेकपा) केपी शर्मा ओली समूहले बैठक अवरुद्ध गर्ने बताएको हो ।

यसअघि गत माघ २५ को बैठकमा अविश्वासको प्रस्ताव टेवल गर्ने कार्यसूची थियो । तर सत्तारुढ नेकपा ओली समूहले नै अवरोध गरेपछि सभामुख प्रदीपकुमार भण्डारीले आजसम्मका लागि बैठक स्थगित गरेका थिए ।

आइतबार दिउँसो २ बजे आह्वान गरिएको बैठक पनि सञ्चालन गर्न नदिने नेकपा ओली समूहका प्रमुख सचेतक बुद्धिकुमार राजभण्डारीले बताएका छन् । बैठक सञ्चालन गर्नका लागि पार्टी दुई वटा हुनु पर्ने उनीहरूको भनाइ छ ।

मुख्यमन्त्री शेरधन राईविरुद्ध परेको अविश्वासको प्रस्ताव पास हुने भएपछि सत्तापक्ष आत्तिएको छ । नेपाली कांग्रेसले पनि अविश्वासको प्रस्तावमा समर्थन गर्ने बताईसकेको छ । पद गुम्ने भएपछि केहि दिन अघि मात्र मुख्यमन्त्री राईले प्रदेश सभा नै भंग हुने धम्की दिएका थिए ।