१२ चैत्र २०७७, बिहीबार ०४:३३ बुधवार साप्ताहिक, नयाँबानेश्वर, काठमाण्डौं

रोकिएन डीआईजीद्वयको असुली

काठमाडौं । नेपाल प्रहरीका दुई डीआईजी धीरजप्रताप सिंह र रवीन्द्र धानुकले अवैध असुलीलाई तीव्र बनाएका छन् । यी दुई डीआईजीका कारण अहिले प्रहरी संगठन नै बदनाम बनेको छ । जहाँ बसे पनि उठ्तीपुठ्तीमा मात्र ध्यान दिने यी दुई डीआईजीलाई अहिले भारतसँगको सीमा जोडिएका ठाउँको जिम्मेवारी बाँदरलाई मकै गोठालो दिएजस्तै भएको छ ।
सिंह अहिले प्रदेश २ प्रमुख छन् । सो प्रदेशमा जानासाथ शुरुमा उनले प्रदेशबाटै घुमुवा खटाएर सीमा सीमाबाट अवैध असुली चलाएका थिए । तर, यसको रिर्पोट प्रहरी प्रधान कार्यालयसम्म पुगेपछि आईजीपी शैलेश थापाले प्रदेशको घुमुवा रोकेका थिए । तर लागेको बानी कहाँ जान्थ्यो र ? प्रदेशबाट घुमुवा खटाउन रोकपछि घुमाउरो बाटो प्रयोग गरेर उनले जिल्लाजिल्लाबाट घुमुवा खटाएको बुझिएको छ । जिल्लाजिल्लाबाट खटाइएका यी घुमुवाले असुलेको रकम डीआईजी सिंहलाई नै बुझाउने गरेको स्रोतको दाबी छ । स्रोतका अनुसार डीआईजी सिंहले पर्सामा हवल्दार श्याम साह सोनार, बारामा हवल्दार प्रमोद सिह, रौतहटमा हवल्दार राज मंगल सिंह र हरेन्द्र ठाकुर, सर्लाहीमा सिपाही रामसेवक ठाकुर र धनुषामा हवल्दार महेन्द्र महतोलाई घुमुवा खटाएका छन् । घुमुवा खटाएपछि सीमामा हुने तस्करी निकै फस्टाएको छ ।
त्यस्तै, लुम्बिनी प्रदेश प्रहरी प्रमुख रवीन्द्र धानुकको रातदिन उठबस नै बालुवाका तस्करहरूसँग हुने गरेको बताइन्छ । । बाँकेका एसपी ओम रानासँग मिलेर क्रसर व्यवसायी र जुवा अखडाहरूबाट रकम असुल्ने गरेको स्रोतले बतायो । स्रोतका अनुसार कपिलवस्तुके एसपी नवराज अधिकारीसँग उनको सम्बन्ध त्यति राम्रो छैन । अख्तियार दुरुपयोग अनुसान्धान आयोगबाट प्रमुख आयुक्त नवीन घिमिरेको आशीर्वादले रूपन्देही गएका एसपी प्रवीण पोखरेलले त उनलाई गन्दै गन्दैनन् । संगठनका आफ्नै मातहतका कर्मचारीले पनि उनलाई गन्न छाड्नुको मुख्य कारण उनको नांगो ढंगको उठ्तीपुठ्तीमा संलग्नाता रहेको बताइन्छ । प्रदेश २ मा सुपारी र केराउको तस्करीलाई कडाइ गरेपछि उसको तस्करी लुम्बिनी प्रदेशमा फस्टाएको थियो ।