२५ चैत्र २०७७, बुधबार ०४:०१ बुधवार साप्ताहिक, नयाँबानेश्वर, काठमाण्डौं

देशैभर बिहानैदेखि बढ्यो वायु प्रदूषण

काठमाडौं । आज बिहानैदेखि लगभग देशैभर तुवाँलो लागेको मौसमविद्ले बताएका छन्।

मौसम पूर्वानुमान महाशाखाले दिएको जानकारीअनुसार देशका पहाडी र तराई भेग तुवाँलोले ढाकेको हो।

आज पश्चिमी क्षेत्रलगायत देशका केही स्थानमा हल्का वर्षाको सम्भावना त छ तर त्यो तुवाँलो हटाउन तथा मौसम सफा गराउन पर्याप्त नहुने बताए ।

काठमाडौं उपत्यकाकै केही स्थानमा आज फाटफुट वर्षाको सम्भावना देखिएको छ, तर यसले तुवाँलो हटाउने वा वायु प्रदूषण घटाउने सम्भावना छैन।

खासगरी पश्चिमी क्षेत्र तथा देशका अन्य पहाडी र तराई क्षेत्रका एक दुई स्थानमा हल्का वर्षाको सम्भावना रहेकाले ती स्थानमा तुवाँलो केही कम हुने सम्भावना देखिए पनि आज दिनभर नै लगभग देशभरै तुवाँलो रहने सम्भावना छ।

मौसमविद्का अनुसार चैतका बेला हावाहुरी चल्ने तथा मेघगर्जनसहित वर्षा हुनुपर्ने हो। तर निकै दिनदेखि त्यसो हुन नसक्दा मौसम सुक्खा भई देशभर डढेलो बढेको छ। जसको धुवाँले वायु प्रदूषण पनि बढेको हो। यसैगरी वायु मण्डल स्थिर हुँदा अर्थात् चलायमान नहुँदा तल्लो वायु मण्डलमा रहेका धुलकणरफोहोर हट्न नपाएको मौसमविद् बताउँछन्।

मौसमविद्का अनुसार फाटफुट हल्का वर्षा हुने सम्भावना रहे पनि कम्तीमा आगामी तीन दिनसम्म डढेलो निभाउने, मौसमै सफा गराउने तथा वायु प्रदूषणै हटाउने गरी पर्याप्त वर्षा हुने सम्भावना छैन।