१ बैशाख २०७८, बुधबार ०८:५६ बुधवार साप्ताहिक, नयाँबानेश्वर, काठमाण्डौं

कर्णाली प्रदेशमा मुख्यमन्त्री शाहीले विश्वासको मत लिने, संसद सचिवालयमा पत्र दर्ता

सुर्खेत। नेकपा एमालेले सरकारको साथ छाडेपछि अल्पमतमा परेका कर्णाली प्रदेशका मुख्यमन्त्री महेन्द्रबहादुर शाहीले विश्वासको मत लिने भएका छन् ।

शाहीले विश्वासको मत लिनका लागि संसद् सचिवालयमा पत्र दर्ता गराएका छन् । मंगलबार पत्र दर्ता गरिएको नेकपा माओवादी केन्द्रका सांसदले जानकारी दिएका छन् । एमालेले चैत ५ गते कर्णाली सरकारलाई दिएको समर्थन फिर्ता लिने निर्णय गरेको थियो । त्यस्तै, मुख्यमन्त्री शाहीको नेतृत्वको सरकारमा रहेका एमालेका तीन मन्त्रीले गत चैत २४ गते राजीनामा बुझाएका थिए ।

राजीनामा दिने या विश्वासको मत लिने विकल्पमध्ये शाहीले विश्वासको मत लिने विकल्प रोजेका हुन् ।

माओवादी केन्द्रका १३ सांसदमध्ये दैलेखका धर्मराज रेग्मीलाई सांसद पदबाट हटाएकाले माओवादीका १२ सांसद छन् । विश्वासको मतका लागि माओवादीलाई २० मत आवश्यक पर्छ । कर्णाली प्रदेशसभा वैशाख ३ गते बस्दै छ । ३ गतेको बैठकमा विश्वासको मत लिने सम्भावना रहेको सांसद विष्टले बताए । मुख्यमन्त्री शाही राजनीतिक दलहरुसँग छलफलमा छन् ।