७ बैशाख २०७८, मंगलवार ०४:५९ बुधवार साप्ताहिक, नयाँबानेश्वर, काठमाण्डौं

गृहमन्त्री थापा हटाइएपछि राष्ट्रिय सभामा रिक्त सदस्य पदको चुनाव गर्ने तयारी

काठमाडौं । आफ्नो पार्टी छाडेर एमाले बनेका गृहमन्त्री रामबहादुर थापालाई नेकपा माओवादी केन्द्रले कारबाही गरेपछि राष्ट्रिय सभामा रिक्त सदस्य पदका लागि निर्वाचन आयोगले निर्वाचन प्रक्रिया अघि बढाएको छ।

संघीय संसद् सचिवालयले राष्ट्रिय सभामा एउटा सदस्य पद खाली रहेको जानकारी गराएपछि आयोगले त्यो परिपूर्तिका लागि आगामी जेठमा चुनाव गर्न गृह मन्त्रालयलाई पत्राचार गरेको हो।

राष्ट्रिय सभा निर्वाचन ऐनअनुसार पदावधि ६ महिनाभन्दा बढी बाँकी रहँदै राष्ट्रिय सभामा सदस्य रिक्त भएमा ३५ दिनभित्र निर्वाचन गराई पदपूर्ति गर्नुपर्ने व्यवस्था गर्नुपर्छ।

गृहमन्त्री थापालाई राष्ट्रिय सभा सदस्य पदबाट बर्खास्त गरिएको मिति वैशाख ५ गते बाट ३५ दिन जेठ ७ गते पुग्छ। यसैले जेठ पहिलो साताभित्र निर्वाचन सम्पन्न हुने गरी आयोगले गृह मन्त्रालयमा सोमबार प्रस्ताव पेस गरेको हो।

आयोगका अनुसार बागमती प्रदेश सभामा १ सय १० र स्थानीय तहका नगर प्रमुख, उपप्रमुख तथा अध्यक्ष, उपाध्यक्ष गरी ३ सय ३८ जनाले मतदानमा सहभागी हुनेछन्।