३२ श्रावण २०७८, सोमबार ०४:५६ बुधवार साप्ताहिक, नयाँबानेश्वर, काठमाण्डौं

माओवादी केन्द्रका जिल्ला कमिटी खारेज

३२ साउन, काठमाडौं । नेकपा माओवादी केन्द्रले पार्टीको विधानमा भएको सांगाठानिक संरचना सशंसोध गर्दै जिल्ला कमिटीहरु खारेज गरेको छ । शनिबार र आइतबार बसेको केन्द्रीय समितिको बैठकबाट संशोधन र परिमार्जनसहित पारित अन्तरिम विधानमा माओवादी केन्द्रले पार्टीका सबै कमिटीलाई संघीय संरचनामा लैजाने निर्णय गरेको छ ।

संविधानअनुसार माओवादी केन्द्रले पनि स्थानीय, प्रदेश र केन्द्र तीनै तहमा पार्टी संरचना बनाउने भएको हो । अब माओवादीको जिल्ला संरचना हटाइएको छ भने जिल्लाको अधिवेशन पनि नगरी समन्वय समितिका रूपमा रहने भएका छन् ।

परिमार्जनअनुसार अब माओवादी केन्द्रले जिल्ला अधिवेशन गर्ने छैन । त्यस्तै, पुस ११ देखि १३ सम्म राष्ट्रिय सम्मेलन गर्ने भएको छ ।

निर्वाचनबाटै अध्यक्षसहित, उपाध्यक्ष, महासचिव, सचिव र कोषाध्यक्षसहित चुनिने व्यवस्था गरिएको विधानमा उपमहासचिव राख्ने प्रस्ताव भने अस्वीकृत भएपछि हटाइएको छ । २०६९ साल माघ २० गते महाधिवेशन गरेको माओवादी केन्द्रले अध्यक्ष, २ उपाध्यक्ष, १ महासचिव, ३ सचिव र १ कोषाध्यक्ष राख्ने व्यवस्था गरेको थियो ।