२३ भाद्र २०७८, बुधबार ०९:२२ बुधवार साप्ताहिक, नयाँबानेश्वर, काठमाण्डौं

माओवादी केन्द्र संसदीय दलको बैठक जारी

२३ भदौं, काठमाडौं, । सत्तारुढ दल नेकपा माओवादी केन्द्रको संसदीय दलको बैठक चलिरहेको छ । बुधबार प्रतिनिधिसभा बैठकमा पार्टीको तयारीलगायत समसामयिक राजनीतिक विषयमा छलफल जारी रहेको छ ।

बैठकमा प्रतिनिधिसभाको आगामी बैठकका सन्दर्भमा पार्टीको रणनीति तय गर्ने, पार्टीको निर्णयअनुसार छलफल तथा सांसदलाई निर्देशन गर्नेलगायत विषयको कार्यसूची रहेको संसदीय दलको कार्यालयले जनाएको छ ।

बैठक अगाडि एक कार्यक्रममा अध्यक्ष पुष्पकमल दाहाल ‘प्रचण्ड’ ले माओवादी केन्द्रलाई घेरा हालेर सिध्याउने षड्यन्त्र पनि भइरहेको आरोप लगाएका थिए । उनले मिलेनियम च्यालेन्ज कर्पोरेसन (एमसीसी) लाई हतियारको रुपमा प्रयोग गरेर वर्तमान गठबन्धन फुटाउने षडयन्त्र भइरहेको आरोप लगाए।

संघीय संसदबाट अमेरिकी सहयोग नियोग एमसीसी पास गराउने–नगराउने बारे राजनीतिक दलहरु विभाजित छन् । शनिबार बसेको मन्त्रिपरिषद बैठकले भदौ २३ गते बुधबार ४ बजेका लागि प्रतिनिधिसभा र राष्ट्रियसभा दुबै बैठक बोलाउन सिफारिस गरेपछि राष्ट्रपतिले अधिवेशन आह्वान गरेकी हुन् । गत साउन ३२ गते सरकारले संसद अधिवेशन अन्त्य गरेको थियो । त्यसलगत्तै सरकारले राजनीतिक दल सम्बन्धी अध्यादेश ल्याएको थियो ।