२८ कार्तिक २०७८, आईतवार ०२:४७ बुधवार साप्ताहिक, नयाँबानेश्वर, काठमाण्डौं

तीन महिनापछि कांग्रेस केन्द्रीय समिति बैठक बस्दै

२८ कात्तिक, काठमाडौं । नेपाली कांग्रेसको केन्द्रीय समिति बैठक आज बस्ने भएको छ । करिव ३ महिनापछि सत्तारुढ दल कांग्रेसको केन्द्रीय कार्यसमिति बैठक आज बस्न लागेको हो । दिउँसो १ बजेका लागि बोलाइएको केन्द्रीय समिति बैठकमा महाधिवेशन तयारीबारे छलफल हुनेछ ।

शनिबार बसेको पदाधिकारी तथा पूर्व पदाधिकारी बैठकले केन्द्रीय समिति बैठकमा हुने छलफलका लागि महाधिवेशन तयारीका एजेण्डा तयार पारेको छ । बैठकले केन्द्रीय निर्वाचन समितिले तयार पारेको १४ औं महाधिवेशन कार्यतालिका अनुमोदन गर्नेछ । भातृ तथा विदेशस्थित जनसम्पर्क समितिबाट महाधिवेशनमा भाग लिने प्रतिनिधिहरु र सरकार सञ्चालनको विषयमा समेत छलफल हुने प्रवक्ता विश्वप्रकाश शर्माले बताए ।

केन्द्रीय समिति बैठकमा समसामयिक राजनीतिक घटनाक्रमबारे पनि छलफल हुनेछन् । सर्वोच्च अदालतको विवादबारे पनि बैठकमा छलफल हुने कांग्रेस नेताहरुले बताएका छन् । केन्द्रीय कार्यसमिति बैठकले केन्द्रीय निर्वाचन समितिले परिमार्जन गरेको महाधिवेशन कार्यतालिका अनुमोदन गर्ने, महाधिवेशनका लागि आवश्यक समितिहरु गठन, महाधिवेशन प्रयोजनका लागि विधानका विभिन्न धारा–उपधारा निलम्बन गर्ने बताइएको छ ।