२९ कार्तिक २०७८, सोमबार १०:४७ बुधवार साप्ताहिक, नयाँबानेश्वर, काठमाण्डौं

प्रधानन्यायाधीशले वार्तामा बोलाएपछि दुबै बार र आन्दोलित न्यायाधीशको संयुक्त वैठक

२८ कात्तिक, काठमाडौं । नेपाल बार एशोसिएसनका पदाधिकारी र प्रधानन्यायाधीशका विरुद्ध आन्दोलित न्यायाधीशहरु छलफलमा जुटेका छन् । प्रधानन्यायाधीशले नेपाल बारलाई वार्तामा आउन आग्रह गरेपछि अब कसरी अघि बढ्ने भन्नेबारे रणनीति बनाउन बार र न्यायाधीशहरूबीच छलफल भएको हो ।

जबराले सोमबार विज्ञप्ति निकालेर दुवै बारलाई वार्तामा बोलाएपछि आन्दोलित न्यायाधीशहरु र दुवै बारका पदाधिकारीबीचको बैठक अहिले सर्वोच्च अदालतको एनेक्स भवनमा बसेको हो । न्यायाधीशहरूले प्रधानन्यायाधीशले मार्गप्रशस्त गर्नुपर्ने माग गर्दै आएका छन् भने बारले पनि प्रधानन्यायाधीशको राजीनामा नआउँदासम्म आन्दोलन जारी रहने बताएको छ । यसैबीच आज प्रधानन्यायाधीश चोलेन्द्र शमशेर जबराले सोमबार विज्ञप्ति जारी गर्दै वर्तमान परिस्थितिमा देखिएका गतिरोधहरूको सम्बोधनको उपयुक्त विकल्प संवाद नै भएको प्रष्ट पारेका थिए ।

उनले न्यायपालिकाभित्र उत्पन्न गतिरोधका कारण नागरिकहरूका प्रश्न हामीतर्फ नै सोझिएको भन्दै नेपाल बार एशोसिएसन र सर्वोच्च अदालत बार एशोसिएसनलाई संवादका लागि आह्वान गरेका हुन् । तर प्रधानन्यायाधीशको आह्वान लगत्तै नेपाल बारको बैठकले प्रधानन्यायाधीशसँग वार्ता नगर्ने निर्णय गरेको थियो ।