४ मंसिर २०७८, शनिबार ०८:१७ बुधवार साप्ताहिक, नयाँबानेश्वर, काठमाण्डौं

खुमलटारमा प्रचण्ड र विप्लवबीच भेटवार्ता

४ मंसिर ,काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ र नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ बीच आज भेटवार्ता भएको छ । प्रचण्डलाई भेट्न शनिबार बिहान विप्लव खुमलटार पुगेका हुन् । भेटमा माओवादी केन्द्रका प्रवक्ता कृष्णबहादुर महरा पनि सहभागी थिए ।

प्रचण्ड र विप्लवको भेटमा पूर्व माओवादी घटक एकताको विषयमा छलफल भएको खुमलटार स्रोतको दाबी छ । दुई नेताबीच कम्युनिस्ट ध्रुवीकृत गर्ने विषयमा कुराकानी भएको छ । दुई नेताबीच तत्काल सहकार्य गर्ने र पार्टी एकता गर्न छलफल चलाउँदै जाने समझदारी बनेको खुमलटार स्रोत बताएको छ । विप्लव निकट अखिल क्रान्तिकारी अध्यक्ष प्रकाश शाहीले सुनाए, ‘भेटका क्रममा एमसीसी, मूल्यवृद्धि र समसामयिक राजनीतिक विषयमा छलफल भएको छ ।

प्रचण्डले पार्टी एकताका लागि पूर्व माओवादी नेतासँग छलफल भइरहेको सार्वजनिक रुपमै बताउँदै आएका छन् । उनले ढिलोचाडो पूर्व माओवादी एकै ठाउँमा हुने दाबी गरेका छन् । अघिल्लो सरकारसँग गरेका तीन बुँदे सहमति भए पनि कार्यान्वयन नभएको भन्दै विप्लवले असन्तुष्टि व्यक्त गरेका छन् ।