१२ मंसिर २०७८, आईतवार ०३:०५ बुधवार साप्ताहिक, नयाँबानेश्वर, काठमाण्डौं

जाजरकोटमा बस दुर्घटना : पाँचको मृत्यु, २७ घाइते

१२ मंसिर, जाजरकोट । जाजरकोटमा गए राति रात्रिबस दुर्घटना हुँदा पाँच जनाको ज्यान गएको छ । नेपालगञ्जबाट जाजरकोटको राडिबजार जाँदै गरेको ना ६ ख २७५७ नम्बरको रात्रि बस जाजरकोटको कुदु बराहचौर नजिक दुर्घटना हुँदा पाँच जनाको ज्यान गएको जिल्ला प्रहरी कार्यालय जाजरकोटले जानकारी दिएको छ ।

प्रहरीका अनुसार आज बिहान २ बजे बस सडकबाट तल खसेर दुर्घटना भएको हो । दुर्घटनामा २७ जना घाइते भएका छन् । राति २ बजे भएको दुर्घटनामा मृत्यु हुनेमा नलगाड ३ करुवाका शेरबहादुर परियार, आठबिसकोट ४ की दिब्या शाही र सप्तरी राजविराज १ घर भएका र हाल दीपेन्द्र आधारभूत विद्यालय सक्ला जाजरकोटमा कार्यरत गंगाराम यादव रहेका छन्। अन्य दुई जनाको भने सनाखत हुन बाँकी रहेको प्रहरी नायब उपरीक्षक मधुकुमार थापाले जानकारी दिए।

घाइतेलाई उपचारका लागि जिल्ला अस्पताल ल्याइएको प्रहरीले जानकारी दिएको छ। घाइतेमध्ये तीन जनाको अवस्था गम्भीर छ। स्यालले बाटो काटिरहेका बेला जोगाउन खोज्दा गाडी पल्टिएको चालक चित्रबहादुर देनारले बताएको प्रहरीले जानाएको छ। चालकलाई प्रहरीले नियन्त्रणमा लिएको छ । उनी घाइते छन्।