२३ माघ २०७८, आईतवार ०४:२७ बुधवार साप्ताहिक, नयाँबानेश्वर, काठमाण्डौं

प्रदेश १ मा आज मन्त्रिपरिषद् विस्तार हुँदै, को-को बन्दैछन् मन्त्री?

२३ माघ, काठमाडौं । प्रदेश १ मा आज मन्त्रिपरिषद् विस्तार हुँदैछ। मुख्यमन्त्री राजेन्द्र राईले गठबन्धनमा सहभागी दललाई भागबण्डा मिलाएर मन्त्रिपरिषद विस्तार गर्न लागेका हुन्।

मुख्यमन्त्री राईले नियुक्त गर्ने मन्त्रीहरुले आज बिहान ११ बजे सपथ लिने कार्यक्रम रहेको मुख्यमन्त्री तथा मन्त्रिपरिषदको कार्यालयले जनाएको छ।

मुख्यमन्त्री राईले सात मन्त्रालय रहेको प्रदेश १ मा गठबन्धनका दलहरुलाई भागबण्डा मिलाउनकै लागि मन्त्रालय फुटाएर १३ बनाएका छन्।

प्रदेश १ सरकारमा कांग्रेसबाट ५, नेकपा (एकीकृत समाजवादी) बाट मुख्यमन्त्रीसहित ४, नेकपा (माओवादी केन्द्र) बाट ३, जसपाबाट १ र संघीय लोकतान्त्रिक मञ्चबाट एक जना मन्त्री हुने समझदारी दलहरुबीच भएको छ।

कांग्रेसबाट आज थप ३ जना मन्त्री हुने स्रोतले जनाएको छ। झापाका ओमप्रकाश सरावागी, ताप्लेजुङका प्रतापप्रकाश हाङगाम र मोरङका शेखरचन्द्र थापा मन्त्री हुने सम्भावना छ।

एकीकृत समाजवादीबाट खोटाङका राजन राई, इलामकी खिनुलङवा लिम्बु र मोरङका उपेन्द्रप्रसाद घिमिरे मन्त्री बन्ने सम्भावना छ।

नेकपा माओवादी केन्द्रबाट खोटाङका रामकुमार राई र झापाका झलकबहादुर मगर मन्त्री बन्ने सम्भावना छ।

एमाले नेता भीम आचार्यलाई हटाएर गएको कात्तिक १६ मा राई मुख्यमन्त्री नियुक्त भएका थिए। उनलाई कांग्रेस, माओवादी र जसपाका ४९ जना सांसदको समर्थन छ।