३ फाल्गुन २०७८, मंगलवार ०५:३४ बुधवार साप्ताहिक, नयाँबानेश्वर, काठमाण्डौं

कांग्रेस संसदीय दलको बैठक सुरु

३ फागुन, काठमाडौं । प्रमुख सत्तारुढ नेपाली कांग्रेस संसदीय दलको बैठक नयाँ बानेश्वरमा सुरु भएको छ।

केही बेरअघि नयाँ बानेश्वरस्थित संसद भवनको ल्होत्से हलमा दलको बैठक सुरु भएको हो।

प्रधानन्यायाधीश चोलेन्द्र शमशेर जबराविरुद्धको महाअभियोग प्रस्तावमाथि छलफल गर्न कांग्रेसले दलको बैठक बोलाएको छ।

त्यसैगरी अमेरिकी सहायता परियोजना एमसीसीलाई संसदमा टेबुल गर्नेबारे पनि यो बैठकमा कुरा हुनेछ।

सत्तारुढ गठबन्धनका दलहरु कांग्रेस, माओवादी केन्द्र र एकीकृत समाजवादीले आइतबार प्रधानन्यायाधीश जबराविरुद्ध संसद सचिवालयमा महाअभियोग प्रस्ताव पेश गरेका थिए।

त्यसैगरी सोमबार सभामुख अग्नि सापकोटाले बोलाएको सर्वदलीय बैठकमा पनि नेताहरु एमसीसी अघि बढाउने दिशामा सहमति नजिक पुगेका थिए। प्रतिनिधिसभाको बैठक बुधबार बस्दैछ।

संसदमा पेश भएको प्रधानन्यायाधीशविरुद्धको महाअभियोग प्रस्तावका सम्बन्धमा प्रमुख प्रतिपक्षी दल एमालेले पनि सोमबार संसदीय दल बैठक गरेको थियो।

एमालेले महाभियोगको प्रतिवाद गर्ने बताए पनि ठोस निर्णय भने गरेको छैन। एमालेले त्यसको निर्णय गर्ने जिम्मा अध्यक्ष केपी ओलीलाई दिएको छ।