२ चैत्र २०७८, बुधबार १२:२९ बुधवार साप्ताहिक, नयाँबानेश्वर, काठमाण्डौं

गठबन्धनको भरमा चुनाव जितौंला भन्ने भ्रम दिमागबाट निकालिदिनुस् : प्रचण्ड

२ चैत, काठमाडौं । सत्तारुढ नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले आउँदो निर्वाचन ‘लाइफ एण्ड डेथ’ भएको बताएका छन् ।

माओवादी केन्द्र उपत्यका विशेष प्रदेश समिति, सम्पर्क समन्वय विशेष प्रदेश समिति र प्रवास समन्वय समितिको राजनीतिक प्रशिक्षण कार्यक्रममा बोल्दै उनले अहिलेको निर्वाचनलाई सामान्य चुनावको रुपमा मात्र नलिएर ‘व्याटल’ को रुपमा बुझ्न निर्देशन दिए ।

लइाडँमा जाँदा हामी कसरी जान्थ्यौं, त्यसै गरी यो निर्वाचनमा जान जरुरी छ, उनले भने, यो निर्वाचन सामान्य हुने छैन । माओवादीलाई स्थानीय तह र अबका निर्वाचनमा परास्त गर्न धेरै शक्तिहरु लागेको उनले टिप्पणी गरे । दुई दलीय प्रणालीमा जाने बहस त्यसैको रुपमा प्रस्तुत भएको उनको भनई छ ।

गठबन्धनको भरमा चुनाव जित्ने भ्रम दिमागबाट निकाल्न उनको कार्यकर्तालाई आग्रह गरे । गठबन्धनको भरमा निर्वाचन जितौंला भन्ने भ्रम दिमागबाट आजै निकालिदिनुस्, उनले भने, आफ्नो तागत र आफ्नै बलमा चुनाब लडौं । जसरी पनि चुनाब जित्ने गरेर अघि बढौं ।

पहिलो संविधान सभामा जनयुद्धको रापतापसहित निर्वाचनमा जाँदा सफलता प्राप्त भएको उनले स्मरण गरे । त्यस्तै जोशका साथ निर्वाचनमा होमिन कार्यकर्तालाई प्रचण्डको निर्देशन छ । आक्रामक ढंगले प्रस्तुत हुन सकियो भने निर्वाचनमा सफलता प्राप्त गर्न सकिन्छ, प्रचण्डले भने, हामी सेटिङ मिलाउन जाँन्दैनौ तर सेटिङ मिलाउनेको सातो लैजान जान्दछौं । संसद विघटनविरुद्धको आन्दोलनको सफलताले उर्जा दिएको उनले बताए ।

उनले अबका दुई महिना सम्पूणर् तागत निर्वाचनलाई लगाउन आग्रह गरे । उनले जनतासँग लुज भएको सम्बन्धलाई सुदृढिकरण गर्ने गरी गाउँ गाउँ जान निर्देशन समेत दिए । आजभोली हामी सहिद परिवारको घर कटेर जान खोज्छौं । घाइते अपाङ्ग साथीहरुलाई सकेसम्म भेट्न नपरे हुन्थ्यो भन्ने पनि देखियो, उनले थपे, त्यसो नगरौं। त्यस्तो गर्ने छुट हामीलाई छैन ।

जनताको सेवा गर्ने भन्दा पनि आफ्नै सेवा गर्नेतर्फ केन्द्रीत हुनु दुर्भाग्य भएको उनको भनाई छ । उनले आत्मसमीक्षा सहित चुनावमा जान उनले आग्रह गरे । देशभर प्रशिक्षणको क्रममा रिपोर्ट लिँदा पार्टी कतै कमजोर नभएको देखिएको उनको भनाई छ ।