३१ बैशाख २०७९, शनिबार ०६:०८ बुधवार साप्ताहिक, नयाँबानेश्वर, काठमाण्डौं

मनाङको ङिस्याङ गाउँपालिकामा एमाले विजयी

३१ वैशाख, काठमाडौं । नेकपा एमालेले अर्को स्थानीय तह पनि जितेको छ। पछिल्लो मतपरिणाम अनुसार मनाङको मनाङ ङिस्याङ गाउँपालिकामा एमाले विजयी भएको हो।

एमालेबाट पालिका अध्यक्षका उम्मेदवार कान्छा घले ८ सय ६१ मत ल्याई विजयी भएका हुन्। कांग्रेसका छिरिङ ओङमा गुरुङले ७ सय १३ मत पाए।

उपाध्यक्षमा भने स्वतन्त्र उम्मेदवार छिरिङ गुरुङ ७ सय ४४ मत ल्याई विजयी भए। कांग्रेसका उम्मेदवार रिन्जेन धोर्जे गुरुङले ७ सय १९ मत पाए।

यसअघि मनाङको चामे गाउँपालिका अध्यक्षमा एमालेका लोकेन्द्र बहादुर घले दोस्रो पटक निर्वाचित भएका छन्।

६१० मत खसेको गाउँपालिकामा उनले ३२० मत प्राप्त गरेका हुन्।

निकटतम प्रतिद्वन्द्वी कांग्रेसका छिरिङ दोर्जे लामाले २७९ मत पाएका छन्। उपाध्यक्षमा भने ३२५ मत ल्याउँदै कांग्रेसकी मिङ्मार डोमा लामा विजयी भइन्।

०७४ को निर्वाचनमा पनि यो पालिकाको अध्यक्ष पद एमालेका घलेले नै जितेका थिए।

उपाध्यक्ष पद कांग्रेसले नै जितेको थियो। यसपटक एमाले र कांग्रेस दुबैले आफ्नो सिट सुरक्षित गरेका छन्।

मुस्ताङको लो–घेकर दामोदरकुण्ड गाउँपालिकामा एमालेका लोप्साङ छोम्पेल विष्ट विजयी भएका छन्।