१८ श्रावण २०७९, बुधबार ०६:१३ बुधवार साप्ताहिक, नयाँबानेश्वर, काठमाण्डौं

सप्तकोशी बस्ती पसेपछि,प्रभावितले सुरक्षित स्थान खोज्न गाउँ छोड्दै

१८ साउन, सुनसरी । सप्तकोशी नदीमा पानीको बहाब बढेर भंगालो फुटेपछि प्रभावित क्षेत्रका बासिन्दाले गाउँ छोड्न थालेका छन् ।
बाढी बस्तीमा पस्न थालेपछि उदयपुरको बेलका नगरपालिकाका–१, २, ८ र ९ का बासिन्दा सुरक्षित ठाउँमा जान थालेका हुन् ।

आज बिहान ४ बजेदेखि नदीले कटान गर्न थालेको हो । प्रभावित क्षेत्रका बासिन्दालाई स्थानान्तरण, राहत र उद्धारको तत्काल व्यवस्थापन गर्न गृहमन्त्री बालकृष्ण खाँणले सम्बन्धित सबै निकायलाई निर्देशन दिएका छन् । उदयपुर परराष्ट्रमन्त्री डा. नारायण खड्काको गृह जिल्ला पनि हो । गृहमन्त्री खाणले सप्तकोशीको कटानबारे परराष्ट्रमन्त्री खड्कासँग पनि छलफल गरेका छन् ।

कटानबाट प्रभावित हुने बस्तीका नागरिकलाई कहाँ स्थानान्तरण गर्ने, उनीहरूलाई तत्कालका लागि बासस्थान, राहतको व्यवस्था कसरी गर्नेबारे छलफल भएको गृह मन्त्रालयले जनाएको छ । कटानले सबैभन्दा बढी डुम्रिकोट तथा लाहुरेखोँचमा प्रभावित बनाएको छ ।

अहिले जोखिममा रहेका बस्तीका नागरिकलाई नजिकका सार्वजनिक ठाउँ र आफन्तकोमा पठाउने काम भइरहेको छ । बेलका नगरपालिकाका मेयर अशोक कार्कीका अनुसार अहिले प्रभावित क्षेत्रमा नेपाली सेना, सशस्त्र प्रहरी, नेपाल प्रहरी, जिल्ला प्रशासन कार्यालय, नगरपालिकाको विपद् व्यवस्थापन टोलीले प्रभावितको उद्धार गरिरहेको छ ।

नगरपालिकाले दुई दिनयता ती क्षेत्रका नागरिकलाई सुरक्षित स्थानतर्फ जानका लागि सूचना प्रवाह गरेको पनि मेयर अशोक कार्कीले बताए । अहिलेको अवस्थामा नदीले धारै परिर्वतन गरेमा छिमेकी सप्तरी जिल्लाको सप्तकोशी र कञ्चनरुप नगरपालिकाका साथै सुनसरीमा समेत क्षति पुग्ने अनुमान छ ।

सप्तकोशी नदी ७० वर्षपछि पुरानै धारमा फर्किएको हो । उदयपुरको बेलका नगरपालिका वडा नम्बर ८ बाट नदी पुरानै धारमा फर्किंदा उदयपुर, सप्तरी र सुनसरीका पाँच वटा पालिका जोखिममा परेका छन् ।

नदीले बेलका नगरपालिका वडा नम्बर ८, डुम्रीबोटेबाट धार परिवर्तन गर्दा नगरपालिकाका वडा नम्बर ८, ९, ३ र २ नम्बर वडाका २३ सय घरपरिवार संकटमा परेका हुन् । सुनसरीको बराह क्षेत्रको ६ र ९ नम्बर १३ सय घरधुरी पनि नदी पश्चिम सर्दा विस्थापन हुने अवस्थामा पुगेका छन् । सप्तकोशी नदीका पश्चिम सोझिँदा सुनसरी र उदयपुरका ३० हजार बढी जोखिममा पर्ने बताइएको छ ।