१९ माघ २०७९, बिहीबार १२:३२ बुधवार साप्ताहिक, नयाँबानेश्वर, काठमाण्डौं

अहिलेको समीकरण फेरिँदैन, रास्वपाले समर्थन पनि फिर्ता लिँदैन : प्रधानमन्त्री

१८ माघ,काठमाडौं । सत्तारुढ नेकपा माओवादी केन्द्रका अध्यक्ष समेत रहेका प्रधानमन्त्री पुष्पकमल दाहाल ‘प्रचण्ड’ ले अहिले नै राजनीतिक समीकरण नफेरिने बताएका छन् । आज (बिहीबार) पार्टी स्थायी कमिटी बैठकपछि केन्द्रीय कार्यालय पेरिसडाँडामा सञ्चारकर्मीसँग संक्षिप्त कुराकानीमा दाहालले सत्ता समीकरण फेरबदल नहुने बताएका हुन् ।

राष्ट्रिय स्वतन्त्र पार्टीले सरकारलाई दिएको समर्थन फिर्ता लिनसक्ने सम्भावनाबारे पत्रकारहरूले सोधेको प्रश्नमा जवाफ दिँदै प्रधानमन्त्री प्रचण्डले रास्वपाले समर्थन फिर्ता नलिने बताए । दाहालले भने, केही हुँदैन । रास्वपाले समर्थन फिर्ता पनि लिनु हुन्न मैले बुझेसम्म ।

सभापति रवि लामिछानेलाई गृहमन्त्री नबनाएपछि सरकारलाई दिएको समर्थन के गर्ने भन्ने विषयमा रास्वपाको केन्द्रीय समिति र संसदीय दलको बैठक बसुन्धरामा बसिररहेको छ । नागरिकता मुद्दामा सर्वोच्च अदालतले सांसद पद नै खारेज गरिदिएका सभापति लामिछानेलाई गृह मन्त्रालयको जिम्मेवारी दिनुपर्ने रास्वपाको माग छ ।