५ फाल्गुन २०७९, शुक्रबार ०७:२५ बुधवार साप्ताहिक, नयाँबानेश्वर, काठमाण्डौं

नेपाललाई स्कटल्याण्डले दियो २७५ रनको लक्ष्य

५ फागुन,काठमाडौं । आइसीसी क्रिकेट विश्वकप लिग–२ स्कटल्याण्डले नेपाललाई २७५ रनको लक्ष्य दिएको छ । कीर्तिपुरस्थित त्रिवि मैदानमा नेपालले टस जितेर फिल्डिङ रोज्दै स्कटल्याण्डलाई ब्याटिङको निम्तो दिएको थियो ।

स्कटल्याण्डले ५० ओभर खेल्दै ९ विकेटको क्षतिमा २७४ रन बनाएको हो । स्कटल्याण्डका लागि मिचेल लिस्क एक्लैले १०७ रन बनाए। सातौं नम्बरमा ब्याटिङ गरेका लिस्कले ८५ बलमा ९ छक्का र ३ चौकाको मद्दतमा अविजित १०७ रन बनाएका हुन् ।
यस्तै ओपनर क्रिस्टोफर म्याक ब्रिज र ब्रान्डन म्याकमुलेनले समान २२ तथा कप्तान रिची बेरिङटन र तोमस म्याकिन्सले समान १९ रन बनाए । क्रिस ग्रिभ्सले १६ रन जोडे भने यसै खेलबाट ओडीआईमा डेब्यु गरेका ज्याक जर्भिसले २६ रन बनाए ।

नेपालका लागि सन्दीप लामिछानेले १० ओभरमा २७ रन खर्चेर ३ विकेट लिए भने कुशल मल्लले ९ ओभरमा १ मेडन राख्दै ४९ रन खर्चेर २ विकेट लिए । सोमपाल कामीले ९ ओभरमा १ मेडन राख्दै ५२ रन खर्चेर १ विकेट लिए भने कुशल भुर्तेलले ६ ओभरमा २२ र दीपेन्द्र सिंह ऐरीले ५ ओभरमा २५ रन खर्चेर १ १ विकेट लिए ।