२९ फाल्गुन २०७९, सोमबार ०७:२० बुधवार साप्ताहिक, नयाँबानेश्वर, काठमाण्डौं

जसपाकी प्रमिलाले फिर्ता लिइन् उपराष्ट्रपतिको उम्मेदवारी

२९ फागुन, काठमाडौं । आउँदो ३ चैतमा हुने उपराष्ट्रपति निर्वाचनका लागि जनता समाजवादी पार्टी (जसपा) बाट मनोनयन दर्ता गराएकी प्रमिला कुमारी यादवले उम्मेदवारी फिर्ता लिएकी छिन् ।

जसपाका रामसहायप्रसाद यादवविरुद्ध उजुरी परेपछि प्रमिलाले उम्मेदवारी दिएकी थिइन् । राष्ट्रपति तथा उपराष्ट्रपति निर्वाचन अधिकृतको कार्यालयले यादवको उम्मेदवारी कायम गरेसँगै प्रमिलाले सोमबार विज्ञप्ति जारी गर्दै उम्मेदवारी फिर्ता लिएको घोषणा गरेकी हुन् ।

जसपाबाट रामसहायप्रसाद र प्रमिला कुमारी, एमालेबाट अष्टलक्ष्मी शाक्य र जनमत पार्टीबाट ममता झाको उम्मेदवारी कायम राखेर अन्तिम नामावली सार्वजनिक गरेको भोलिपल्ट उनले आफ्नो उम्मदवारी निष्क्रिय पारेकी हुन् । उनले उम्मेदवारी फिर्ता लिएको घोषणा गर्दै गठबन्धनका साझा उम्मेदवार रामसहाय यादवलाई सहयोग गर्न सबै पार्टीलाई आग्रह गरेकी छिन् ।