१२ जेष्ठ २०८०, शुक्रबार ११:४७ बुधवार साप्ताहिक, नयाँबानेश्वर, काठमाण्डौं

राष्ट्रपतिले फर्काइ दिए रेशम चौधरीको आममाफीको फाइल

१२ जेठ, काठमाडौं । टीकापुर हत्याकाण्डका मुख्य अभियुक्त रेशम चौधरीलाई माफी दिन माग गर्दै सरकारले राष्ट्रपति कार्यालयमा पठाइएको निवेदन फाइल फिर्ता भएको छ । राष्ट्रपति कार्यालयले निवेदन आज गृह मन्त्रालयमै फिर्ता पठाएको हो । गणतन्त्र दिवसको अवसर पारेर रेशमलाई आममाफी दिन माग गर्दै सरकारले राष्ट्रपति कार्यालयमा निवेदन दिएको थियो ।

प्रचलित कानुन, यस सम्बन्धमा अदालतबाट भएको फैसला र सर्वोच्च अदालतबाट प्रतिपादित सिद्धान्तविपरीत नहुने गरी कानुन बमोजिम हुने गरी गर्न भनेर निवेदन गृहमा फिर्ता पठाइएको राष्ट्रपति कार्यालयले जानकारी दिएको छ । ‘रेशम चौधरीको आममाफीका सम्बन्धमा प्रचलित कानुन, रेशम चौधरीको मुद्दासम्बन्धी सर्वाेच्च अदालतको फैसला, सर्वाेच्चद्वारा प्रतिपादित सिद्धान्तविपरीत नहुने गरी कानुन बमोजिम गर्न’ भनेर राष्ट्रपति कार्यालयले गृह मन्त्रालयमा फाइल फिर्ता गरेको शीतलनिवासले जनाएको छ ।

राष्ट्रपति पौडेलले टीकापुर नरसंहारमा हत्या भएका प्रहरी निरीक्षक (इन्स्पेक्टर) केशव बोहराकी पत्नी शारदा बोहराले शीतल निवासमा शुक्रबार नै दर्ता गराएको निवेदन पनि गृह मन्त्रालयमा पठाएको प्रेस संयोजक खिला कार्कीले जानकारी दिए ।