२४ असार २०८०, आईतवार १०:३६ बुधवार साप्ताहिक, नयाँबानेश्वर, काठमाण्डौं

ललिता निवास प्रकरण : समर्जङ कम्पनीका प्रमुखसहित थप दुई जना पक्राउ

२४ असार, काठमाडौँ । बालुवाटारस्थित ललिता निवास जग्गा हिनामिना प्रकरणमा पूर्व नापी अधिकृत ध्रुव अर्याल र समर्जङ कम्पनीका प्रमुख लोकहरि घिमिरे पक्राउ परेका छन् ।

सरकारी जग्गा हिनामिना गरिएको आरोपमा उनीहरु आइतबार काठमाडौँबाट पक्राउ गरिएको सीआईबीका एसएसपी दिनेश आचार्यले जानकारी दिए । प्रहरीले यस प्रकरणमा पछिल्लो पटक ११ जनालाई पक्राउ गरिसकेको छ । आज पक्राउ परेका दुई जनासँगै पक्राउ पर्नेको संख्या ११ पुगेको हो । यसअघि गत मंगलबार भाटभटेनी सुपरमार्केटका सञ्चालक मीनबहादुर गुरुङसहित सात जना एकै पटक पक्राउ परेका थिए ।

गुरुङसहित धर्मप्रसाद गौतम, सुधीरकुमार शाह र गोपाल कार्कीलाई प्रहरीले पक्राउ गरेको थियो । उनीहरू अहिले पनि हिरासतमै छन् । सीआईबीले पक्राउ गरेका अन्य तीन जनालाई भने त्यही दिन छाडेको थियो । उनीहरूलाई सर्वोच्चबाट पक्राउ नगर्न आदेश जारी भएको थियो ।

त्यस्तै, प्रकरणमा जोडिएका काठमाडौं महानगरका अधिवृकत शिवजी भट्टराई, नक्कली मोही बाबुराजा महर्जन र नापीका कर्मचारी घमनकुमार कार्कीलाई पक्राउ गरेको थियो । त्यसपछि समर्जङ कम्पनीका तत्कालीन प्रमुख रमेश कुमार पोखरेल र देवनारायण महर्जनलाई प्रहरीले गत सोमबार पक्राउ गरेको थियो । प्रहरीले यस प्रकरणमा ४०६ जनालाई प्रतिवादी बनाएर अनुसन्धान अघि बढाएको छ ।