२६ श्रावण २०८०, शुक्रबार ०८:३६ बुधवार साप्ताहिक, नयाँबानेश्वर, काठमाण्डौं

एमालेको अवरोधले प्रतिनिधि सभा बैठक पनि स्थगित

२६ साउन,काठमाडौँ । सुन तस्करी छानबिनका लागि उच्चस्तरीय समिति गठन गर्न माग गर्दै प्रमुख प्रतिपक्ष नेकपा एमालेले नाराबाजी गरेपछि आज (शुक्रबार) को प्रतिनिधिसभा बैठक पनि अवरुद्ध भएको छ ।

बैठकको सुरुमै एमालेका सांसदहरुले अवरोध गरेपछि सत्तापक्षका सांसदहरुले पनि उठेर बोल्न नदिने रणनीति लिएका थिए । एमालेकी सांसद ज्वालाकुमारी साहलाई सभामुख देवराज घिमिरेले बोल्न समय दिएपछि सत्तापक्षका सांसदहरुले त्यसलाई अवरोध गर्ने रणनीतिका साथ उठेर विरोध गरेका थिए ।

सत्तापक्षमा सांसदहरुले उठेपछि एमालेका सांसदहरुले वेल घेराउ गर्दै सरकार र सत्ता पक्षबिरुद्ध नाराबाजी गरेका छन् । एमालेका सांसदहरुले नाराबाजी गरेपछि आज पनि प्रतिनिधि सभा बैठक स्थगित भएको छ । यही साउन २९ गते सोमवार दिनको एक बजे बस्नेगरी बैठक स्थगित गरिएको हो । यसअघि राष्ट्रिय सभाको बैठकमा पनि एमालेले अवरोध गरेको थियो ।