१७ भाद्र २०८०, आईतवार ०८:२८ बुधवार साप्ताहिक, नयाँबानेश्वर, काठमाण्डौं

तत्कालीन सरकारले छिमेकीलाई चुच्चे नक्साको विवरण पठाएको देखिएन : परराष्ट्र मन्त्री

१७ भदौ, काठमाडौं । परराष्ट्र मन्त्री एनपी साउदले पछिल्लो समय देखिएको नक्साको विवाद कूटनीतिक माध्यमबाट समाधान गर्ने बताएका छन् ।

नेपाली कांग्रेस जिल्ला कार्यसमिति ओखलढुंगाको कार्यालयमा आज (आइतबार) पत्रकारसँगको कुराकानीमा उनले कूटनीतिक संवाद र छलफलबाट पछिल्लो समय देखिएको नक्साबारेको विवाद समाधान गरिने बताएका हुन् । ‘हामी हाम्रो नक्सामा प्रतिवद्ध छौं । धेरै विवाद गरिरहने भन्दा सबै देशसँग कूटनीतिक संवाद र छलफलबाट समाधान गर्छौ, साउदले भने, ‘हामी हाम्रो नक्साको सबै छिमेकी मुलुक र अन्य देशले पनि सम्मान गरुन् भन्ने चाहन्छौँ ।

‘२०७५ सालमा संसद्बाट पास गरेपछि छिमेकीसहित अन्तर्राष्ट्रिय समुदायसम्म नक्सा गइसकेको जानकारी भेटिएन’ साउदले भने, ‘तत्कालीन अवस्थामा जिम्मेवारीमा रहेका साथीहरूले नक्साबारे जानकारी पठाएको बताएका थिए । तर नक्सा पठाइएको कूटनीतिक विवरण भेटिएन ।

चीनले एक साताअघि सार्वजनिक गरेको नक्साबारे सरकारले स्पष्ट पारिसकेको बताए । उनले सबै देशले नेपालको नक्साको सम्मान गर्नुपर्ने पनि बताए । चीनले यही अगष्ट २८ तारिखमा नेपालले नयाँ नक्सामा समावेश गरेको लिपुलेक र लिम्पियाधुरासहितको भूभाग भारतमा परेको उल्लेख थियो । कालापानी समेत भारतमा देखाइएपछि नेपाल रुस्ट छ ।
यसबारे परराष्ट्र मन्त्रालयले सन् २०२० मै नेपाली संसदबाट सर्वसम्मतिले स्वीकृत नक्सामा नेपाल दृढतासहित स्पष्ट उभिएको जनाएको छ । परराष्ट्रले नेपालको नक्सालाई छिमेकी र अन्तर्राष्ट्रिय समुदायले सम्मान गर्नुपर्ने पनि बताएको छ ।