२ बैशाख २०८३, बुधबार ०३:४७ बुधवार साप्ताहिक, नयाँबानेश्वर, काठमाण्डौं

ओली र लेखकमाथि अनुसन्धान जारी, प्रहरीद्वारा भ्रामक सूचना नफैलाउन आग्रह

काठमाडौँ — पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक माथि अनुसन्धान जारी रहेको प्रहरीले जनाएको छ।

जिल्ला प्रहरी परिसर काठमाडौँले मंगलबार सार्वजनिक गरेको जानकारीअनुसार, उनीहरूमाथि भइरहेको अनुसन्धान स्वतन्त्र, निष्पक्ष र विधिसम्मत ढंगले अघि बढाइएको छ। अनुसन्धान जिल्ला सरकारी वकिल कार्यालयसँगको समन्वयमा भइरहेको प्रहरीले स्पष्ट पारेको छ।

उल्लेखनीय छ कि चैत १४ गते पक्राउ परेका ओली र लेखकलाई सर्वोच्च अदालतको परमादेशपछि चैत २६ गते रिहा गरिएको थियो। हाल उनीहरूलाई माथवर व्यक्तिको जमानीमा राखेर अनुसन्धान प्रक्रिया अगाडि बढाइएको प्रहरीले जनाएको छ।प्रहरीले सामाजिक सञ्जाल तथा विभिन्न सञ्चारमाध्यममा फैलिरहेका भ्रामक, अप्रमाणित तथा तथ्यहीन सूचना नप्रसारण गर्न सबैलाई अनुरोध गरेको छ। यस्ता गतिविधिले अनुसन्धान प्रक्रियामा असर पार्न सक्ने भन्दै जिम्मेवार सूचना प्रवाह गर्न अपिल गरिएको छ।

प्रहरीले यस प्रकरणमा कानुनी प्रक्रिया अनुसार अनुसन्धान जारी राखेको बताउँदै कुनै पनि निष्कर्षमा पुग्नुअघि आधिकारिक स्रोतबाट मात्र जानकारी लिन आग्रह गरेको छ।