३ बैशाख २०८३, बिहीबार १४:१२ बुधवार साप्ताहिक, नयाँबानेश्वर, काठमाण्डौं

बिरामीलाई झट्का: अब हप्तामा २ दिन अस्पतालको ओपिडी सेवा बन्द!

काठमाडौं । सरकारले महत्वपूर्ण निर्णय गर्दै अब देशभरका सरकारी अस्पतालहरूमा पनि हप्तामा दुई दिन सार्वजनिक बिदा लागू गर्ने तयारी गरेको छ।

यस निर्णयअनुसार, शनिबार र आइतबार ओपिडी  सेवा पूर्ण रूपमा बन्द रहनेछ। तर आकस्मिक र अन्तरंग  सेवा भने २४ सै घण्टा सञ्चालनमा रहनेछ।

स्वास्थ्य क्षेत्रमा क्रियाशील १४ वटा पेशागत संगठनको चर्को दबाबपछि सरकार यो निर्णय गर्न बाध्य भएको हो। स्वास्थ्यकर्मीहरूले लामो समयदेखि बढ्दो कार्यबोझ, मानसिक तनाव र समान अधिकारको माग गर्दै आएका थिए।

यसअघि सरकारले सबै सरकारी कर्मचारीलाई दुई दिन बिदा दिने निर्णय गरे पनि अस्पतालमा आइतबार ओपिडी खुला राख्ने निर्णयले असन्तुष्टि बढेको थियो। अन्ततः आन्दोलनको चेतावनीपछि सरकार पछि हटेको छ।

अब बिरामीहरूले सामान्य उपचारका लागि आफ्नो योजना मिलाउनुपर्ने भएको छ, किनकि सप्ताहन्तमा ओपिडी सेवा उपलब्ध हुने छैन।

 सरकारले भने आकस्मिक सेवालाई अझ प्रभावकारी बनाउन तयारी थालेको जनाएको छ।