काठमाडौँ । काठमाडौँ उपत्यका अपराध अनुसन्धान कार्यालय ले शैक्षिक परामर्श संस्थामाथि व्यापक अपरेशन चलाउँदै उपत्यकाभरका ९५ वटा कन्सल्टेन्सीमा छापा मारेको छ । शुक्रबार गरिएको विशेष अनुगमनका क्रममा प्रहरीले ६९ जनालाई नियन्त्रणमा लिएको जनाएको छ ।

प्रहरीका अनुसार शैक्षिक परामर्शको नाममा ठगी, अवैध आर्थिक कारोबार तथा कागजातसम्बन्धी अनियमितता भइरहेको आशंकापछि एकैपटक विभिन्न स्थानमा अनुसन्धान अघि बढाइएको हो ।

कार्यालयका एसपी रामेश्वर कार्की ले पक्राउ परेकामाथि आवश्यक स्क्रिनिङ गरी थप अनुसन्धान प्रक्रिया अगाडि बढाइने जानकारी दिए । उनले केही कन्सल्टेन्सीले वैदेशिक अध्ययनका नाममा विद्यार्थी र अभिभावकलाई भ्रममा पार्ने, अनधिकृत शुल्क असुल्ने तथा नक्कली कागजात प्रयोग गर्ने गतिविधि गरेको प्रारम्भिक सूचनाका आधारमा कारबाही गरिएको बताए ।

उपत्यकाभर एकैपटक सञ्चालन गरिएको यो अपरेशनपछि शंकास्पद रूपमा कन्सल्टेन्सी सञ्चालन गर्ने व्यवसायीहरूमा त्रास फैलिएको छ । प्रहरीले कागजात, कम्प्युटर तथा आर्थिक कारोबारसम्बन्धी विवरण समेत नियन्त्रणमा लिएर अनुसन्धान गरिरहेको जनाएको छ ।

प्रहरीले विद्यार्थी तथा अभिभावकलाई कुनै पनि शैक्षिक परामर्श संस्था छनोट गर्दा सरकारबाट स्वीकृति प्राप्त भए/नभएको, शुल्क संरचना तथा सेवा प्रक्रियाबारे राम्रोसँग बुझ्न आग्रह गरेको छ ।