४ जेष्ठ २०८३, सोमबार ०४:३० बुधवार साप्ताहिक, नयाँबानेश्वर, काठमाण्डौं

११औँ महाधिवेशनपछि पहिलो ठूलो जिम्मेवारी बाँडफाँट गर्दै एमाले

काठमाडौं ।केपी शर्मा ओली नेतृत्वको एकीकृत मार्क्सवादी–लेनिनवादी (एमाले) को केन्द्रीय सचिवालय बैठक आज बस्दैछ। पार्टी कार्यालय सचिव डा. भीष्म अधिकारीका अनुसार बैठक दिउँसो १ बजे भक्तपुरको गण्डुस्थित अध्यक्ष ओली निवासमा आयोजना हुने भएको हो।

यसअघि जेठ २ गते बस्ने तय भएको बैठक तयारी नपुगेको भन्दै स्थगित गरिएको थियो। आजको बैठकलाई एमालेभित्र संगठनात्मक पुनर्संरचना र आगामी स्थानीय तह निर्वाचनको तयारीसँग जोडेर महत्त्वपूर्ण रूपमा हेरिएको छ।

पार्टी स्रोतका अनुसार बैठकको मुख्य एजेन्डा ११औँ महाधिवेशनपछि नेताहरूबीच जिम्मेवारी बाँडफाँट गर्ने रहेको छ। विशेषगरी आगामी स्थानीय तह निर्वाचनलाई लक्षित गर्दै केन्द्रीय सदस्यहरूलाई स्थानीय तहसम्म खटाउने तयारी गरिएको छ।

एक नेताका अनुसार प्रत्येक केन्द्रीय सदस्यलाई एउटा नगरपालिका वा गाउँपालिकाको जिम्मेवारी दिइनेछ। उनीहरूलाई स्थानीय तहमा पार्टी संगठन सुदृढ बनाउन, कार्यकर्ता परिचालन गर्न तथा जनतासँग प्रत्यक्ष सम्पर्क विस्तार गर्न निर्देशन दिइने तयारी छ।

त्यसैगरी, केन्द्रीय विभाग तथा विभिन्न निकायहरूमा समेत जिम्मेवारी वितरण गर्ने विषयमा बैठकमा विस्तृत छलफल हुने जनाइएको छ। एमालेले संगठनलाई अझ सक्रिय र चुनावकेन्द्रित बनाउने रणनीति अघि सारेको नेताहरूको भनाइ छ।

बैठकले गत फागुनमा सम्पन्न निर्वाचनहरूको समीक्षा गर्न बस्ने केन्द्रीय कमिटी बैठकको मिति पनि तय गर्नेछ। पार्टीभित्र निर्वाचनको समीक्षा, संगठनात्मक अवस्था र आगामी रणनीतिबारे व्यापक छलफलको तयारी भइरहेको बताइएको छ।

यता सरकारले हालै हटाएका सुकुम्बासी बस्ती, उनीहरूको व्यवस्थापन तथा सरकारी कदमप्रति जनस्तरमा देखिएको असन्तुष्टिको विषय पनि बैठकको एजेन्डामा समेटिएको छ। नेताहरूका अनुसार जनभावना, सामाजिक असर र राजनीतिक प्रभावबारे सचिवालयमा गम्भीर छलफल हुने अपेक्षा गरिएको छ।